Хатуухан хэлэхэд УИХ-ын сонгуулийн үе байсан бол талийгаач нарыг бараг л босгоод ирнэ гэж амлах байв. Одоо нэгэнт хэрэгцээ нь өнгөрсөн учраас тойргийнх нь иргэд яах нь ёстой хамаагүй бөгөөд гишүүдийн үнэн нүүр царай энэ.
МАН-ын Ж.Чинбүрэн, Х.Булгантуяа, Э.Бат-Амгалан нар БЗД-ийн 23 дугаар тойрогт ялалт байгуулж гарч ирсэн. Тэгвэл тэдний төлөө саналаа өгсөн 7 хүн цаг бусаар хорвоог орхиж 1 хүн тархинд нь цус харвасан ч эмнэлгийн тусламж авч чадаагүй байдаг. Энэ нь тухайн эмнэлгийн удирдлагын арга барил муу, мэдлэг чадвар дулимаг, эмч нарын ёс зүйгүй, хариуцлагагүй үйлдлээс болж ийм ЭМГЭНЭЛТ байдал хэдхэн сарын дотор гарчхаад байгаа юм.
Товчхондоо бол энэ эмнэлгийн даргыг авч ирсэн нэр бүхий 3 гишүүний буруу болж таараад байгаа юм. Гурван гишүүнийг гурвууланг нь хамаатуулж буй нь “”Нэг үхрийн эвэр доргивол…” гэдэгчлэн хэлж буй хэрэг.
Ард иргэдийн гомдлын дагуу очсон шалгалт нь байцаалт авч байгаа юм шиг эмч, сувилагч ажилчдаас баахан зүйл асууж асуучхаад явахдаа даргад нь “ТЭР ЧИНЬ ТЭГЖ, энэ чинь ИНГЭЖ хэлж байна шүү…” гэж хэлчхээд явсан учраас өөр хооронд хагаралдах шалтгаан болж өдгөө 4 эмчийг халжээ.
Мэддэг чаддаг, мэдлэг чадвартай, ёс зүйтэй эмч нар халагдсаны горыг ийнхүү ард иргэд амь насаараа амсчхаад байна. Хүнд өвчтэй хүнээ аваад хот руу явсан эмчийн оронд дуудлаганд явчих эмчгүйгээс болж өнгөрч долоо хоногийн Пүрэв гарагт 7 дахь иргэн хорвоог орхижээ.
Товчхондоо бол сонгуулийн үеэр сайн ажилласан гэж авч ирсэн эмчийнх нь хариуцлагагүй, ёс зүйгүй байдлаас болж ийм ЭМГЭНЭЛТ байдалд хүрчхээд байгаа бөгөөд УИХ-ын 3 гишүүний нөмөр нөөлөгт байгаа тул түүнтэй хариуцлага тооцох албан тушаалтан нь ч ЖУЛДАЖ байна гэсэн үг.
Хэнийг ч хаана ч томилж, ажиллуулж болно. Гэхдээ эрүүл мэндийн байгууллага бол ТОГЛООМ биш. Тиймээс мэдлэг чадвартай, ёс зүйтэй, тангарагтаа үнэнч, хүний төлөө гэсэн сэтгэлтэй, урмын сайхан үгээр ч хэсэгхэн зуурч гэсэн илааршуулж, тайвшруулж чаддаг тийм л эмч нарыг л Хонхорын ард түмэн хүсч байгаагаа дахин дахин хэлээд байгаа юм.
Эцэст нь хэлэхэд Хонхорынхны ярьж буйгаар албан тушаалын наймаалцал нь 7 хүний амь насанд хүрч, олон хүний эрүүл мэндээр наадчихаад байна. Иймд эрхэм гишүүд нэгийг бодож хоёрыг тунгааж Хонхорын ард түмнийг харж үзэх ёс зүйд нийцэх биз ээ.
Эх сурвалж: Erennews.mn
