Монгол Улсын Ерөнхий сайд Н.Учрал Ховд аймгийн Эрдэнэбүрэн сумын нутаг, Ховд голын Шижигтийн хавцалд хэрэгжиж буй Эрдэнэбүрэнгийн усан цахилгаан станц (УЦС)-ын төслийн талбайд өнөөдөр (2026.10.18) ажиллаж, бүтээн байгуулалттай танилцлаа. Ерөнхий сайдын зүгээс тус төсөл нь сэргээгдэх эрчим хүчний бусад эх үүсвэрийг системд үр ашигтай нэгтгэж, баруун бүсийн эрчим хүчний хангамжийг бэхжүүлэхэд чухал үүрэгтэй тул төлөвлөсөн хугацаанд нь ашиглалтад оруулахад бүх талууд хамтран эрчимтэй ажиллах шаардлагатайг онцоллоо. Энэ хүрээнд холбогдох талууд уялдаа холбоогоо хангаж, тулгамдсан асуудлыг шуурхай шийдвэрлэж, төслийн хэрэгжилтийг бодит үр дүн болгож ажиллахыг үүрэг болголоо.
Ерөнхий сайд Н.Учрал эрчим хүчний салбар нь улс орны эдийн засгийн тусгаар тогтнол, үндэсний аюулгүй байдлын үндсэн тулгуур бөгөөд Эрдэнэбүрэнгийн УЦС-ын бүтээн байгуулалтыг стратегийн болон түүхэн ач холбогдолтой төсөл хэмээн онцоллоо.
Мөн Эрчим хүчний сайд Б.Найдалаагийн ОХУ-д хийж буй албан томилолтын хүрээнд баруун бүсийн эрчим хүчний системд 55 МВт хүртэлх чадлаар цахилгаан эрчим хүч авах асуудлаар тохиролцоонд хүрснийг мэдэгдэв.
Энэхүү төсөл нь дотоодын эрчим хүчний эх үүсвэрийг нэмэгдүүлж, импортын хамаарлыг бууруулан, эрчим хүчний бие даасан байдлыг бэхжүүлэхэд чухал ач холбогдолтой юм. Нийт 266.4 сая ам.долларын өртөгтэй, БНХАУ-ын Засгийн газрын хөнгөлөлттэй зээлийн санхүүжилтээр хэрэгжиж буй уг төсөл нь 90 МВт-ын суурилагдсан хүчин чадалтай бөгөөд 2030 онд ашиглалтад оруулахаар төлөвлөж байна. Төслийн хүрээнд тус бүр 22.5 МВт-ын хүчин чадалтай дөрвөн агрегат бүхий усан цахилгаан станц барьж байгуулах юм.
Барилга угсралтын ажил энэ оны гуравдугаар сард эхэлсэн бөгөөд өнөөдрийн байдлаар нийт гүйцэтгэл 40 хувьд хүрчээ. Төслийн талбайд гүйцэтгэгч компанийн 225 ажилтан, орон нутгийн 250 иргэн тус тус ажиллаж байна. Бэлтгэл ажлын хүрээнд 49.8 км ашиглалтын авто зам, Ховд гол дээрх хоёр гүүр, ажилчдын кемп, бетон зуурмаг, хайрга боловсруулах үйлдвэр, лаборатори, агуулах, засварын цехийн барилгын ажлыг бүрэн дуусгажээ.
Үндсэн байгууламжийн ажлаас голдирол зайлуулах туннелийн гүйцэтгэл 90 хувь, станцын барилгын суурийн ухлага 50 хувь, ус дамжуулах үндсэн туннель 47.11 хувь, ус хаях суваг 40 хувь, станцын барилгын суурийн ажил 12 хувийн гүйцэтгэлтэй байна.
Баруун бүсийн цахилгаан эрчим хүчний хэрэглээ энэ оны хүлээгдэж буй гүйцэтгэлээр 352.6 сая кВт.цагт хүрч, үүний 294.9 сая кВт.цагийг ОХУ болон БНХАУ-аас импортоор авч байна. Эрдэнэбүрэнгийн УЦС ашиглалтад орсноор жилд дунджаар 366.8 сая кВт.цаг цахилгаан эрчим хүч үйлдвэрлэж, дотоодын сэргээгдэх эрчим хүчний эх үүсвэрийг нэмэгдүүлэх, импортын хамаарлыг бууруулах, бүс нутгийн эрчим хүчний аюулгүй байдлыг бэхжүүлэх ач холбогдолтой юм. Түүнчлэн барилгын үе шатанд 800-1000 түр ажлын байр, ашиглалтад орсны дараа 60–80 хүний байнгын ажлын байр шинээр бий болж, усан санг түшиглэн аялал жуулчлал, усалгаатай газар тариаланг хөгжүүлэх боломж бүрдэнэ.
Төслийн хүрээнд нийт 30 мянга орчим га талбайг улсын тусгай хэрэгцээнд авсан бөгөөд усан сангийн талбай нь Баян-Өлгий аймгийн Баяннуур, Увс аймгийн Өмнөговь, Ховд аймгийн Эрдэнэбүрэн, Мянгад сумын нутгийг хамарч байна. Эрдэнэбүрэнгийн УЦС нь баруун бүсийн эрчим хүчний хангамжийг найдвартай болгох, импортын хараат байдлыг бууруулах, сэргээгдэх эрчим хүчний үйлдвэрлэлийг нэмэгдүүлэх стратегийн ач холбогдолтой бүтээн байгуулалт юм.
Discussion about this post