Германы “DW” агентлагийн редактор Алекс Бодин Монгол Улсын сошиал орчинд Оросын хуурамч мэдээлэл ихээхэн тархаж, олон нийтийг эргэлзүүлэх, төөрөгдүүлэх, талцуулахад хүчтэй нөлөөлж байгааг тайлбарласан сонирхолтой нийтлэл бичжээ.
Тухайлбал, Монгол-Францын ураны гэрээтэй холбогдуулж олон нийтийг төөрөгдөлд оруулах, эргэлзээнд хүргэх зорилгоор худал мэдээлэл цацсан тухай Монголын баримт шалгах Nest center байгууллагын судалгааг иш татаж мэдээлсэн байна.
Тэгвэл уг нийтлэлтэй холбогдуулж, манай улсад сүүлийн үед шатахууны хангамжтай холбоотой олон нийтийг төөрөгдүүлсэн, турхирсан мэдээлэл хүчтэй түгж байгаа нь Оросын дээрх технологийн үйлчлэл байж болзошгүй хэмээн иргэд сэтгэгдэл бичсэн байна. Энэ нь Оросын нөлөөг Монголд бэхжүүлэх дараагийн нүүдлээ хийхээс өмнө олон нийтийн сэтгэлзүйг бэлдэх зорилготой байх боломжтой гэжээ. Өөрөөр хэлбэл, “Роснефть”-ийн шатахуун түгээх станцуудыг Монголд байгуулчихвал тасалдал үүсэхгүй гэх итгэл үнэмшлийн эхлэлийг тавих зорилготой байх боломжтой аж.
Түүнчлэн, энэ өдрүүдэд Монгол-Оросын Засгийн газар хоорондын комисс хуралдаж байгаа. Тэгвэл үүнтэй давхцаж шатахууны импортын нийлүүлэлт тасалдаж буй нь хэлэлцээрт барьцаа ахиулах гэсэн хойд хөршийн сонирхол байхыг үгүйсгэхгүй гэжээ. Дашрамд өгүүлэхэд, ОХУ-д манай улсыг нөлөөндөө байлгах хамгийн том зэвсэг бол шатахуун юм. Харин манай улс уг нөлөөллийг саармагжуулж дотооддоо шатахуун нөөцлөх, цаашлаад нефть боловсруулах үйлдвэртэй болох зорилго тавьсан нь хойд хөршид таалагдахгүй байгаа нь лавтай.
