Монголын улс төрд хар залуугаараа орж Сонгинохайрхан дүүргийн иргэдийн итгэлийг өвөртлөсөн хүн бол УИХ-ын гишүүн Ням-Осорын Учрал юм. Түүнийг МАН-ын залуус хүлээн зөвшөөрч НАМЗХ-ны Ерөнхийлөгчөө болгоод зогсохгүй У.Хүрэлсүхийн залгамжлагч гэдэг. Ерөнхий сайд У.Хүрэлсүх түүнийг Ирээдүйтэй улс төрч хэмээн магтаж байсан юм.
Н.Учрал бага залуугаасаа эрдэм ном хөөж Англи улсад сургууль төгсөөд зогсохгүй докторын зэрэг хамгаалсан боловсролтой нэгэн. Түүний хувьд 2020 оны УИХ-ын сонгуульд Монгол Улсын хэмжээнд нэгдүгээрт бичигдэх хамгийн олон сонгогч нарын санал авсан нэр дэвшигч, ялагч юм.
Сонгуулиас хойш түүний бие тааруу байна, эмнэлэгт ухаангүй хүргэгдлээ, 3-5 удаа мэс засалд орлоо, “Түүний бие хүнд байна, ухаан ороогүй” гэх мэдээлэл тасрахаа байж МАН-ын гишүүд, лидерүүд ээлж дараалан эргэж байгаа билээ.
Сонгинохайрхан дүүргийн сонгогчид, бие төлөөлөгч нар хүртэл эргэж тойрох хүсэлтээ илэрхийлсэн. Ямартаа ч УИХ-ын гишүүн Н.Учралын бие сайжрал олохгүй байгаад иргэд, сонгогчид МАН-ын гишүүд ихэд санаа зовон гайхширч байгаа юм. Тэр утгаараа “Яагаад ийм байдалд хүрэв” гэсэн таамаг дэвшүүлж эхэлжээ.
Олон мянган сэтгэгдэл дотор “Н.Учрал эрүүл мэнддээ анхаарч спортоор тогтмол хичээлдэг, заал танхимд бэлтгэл сургууль хийдэг хүн. Ямар нэг зүйл болов уу” гэсэн хардлага дэвшүүлж эхэллээ. Идэр залуухан, бие бялдарын хувьд хөгжил сайтай залуу улс төрчийг санаатай хордуулав уу, өш хонзон уу гэсэн таамаг өөрийн эрхгүй гарч байгаа бололтой.
Хамгийн сүүлд хэн хэнтэй байв, юу идэж уув гэдгийг Тагнуул, цагдаагаас ил бишээр шалгаж байгаа гэсэн мэдээлэл байна. Ийм хардлага байхаас аргагүй юм. Ирээдүйтэй бэлтгэсэн боловсон хүчнийг ямар нэг аргаар замаасаа зайлуулдаг атаархагчид, хонзогногчид байдаг тухай олон жишээ, баримт, түүх байдаг шүү дээ.
Н.Учралын биеийн байдал юунаас болов, учир шалтгаан зэргийг ар гэрийнхэн болон бие төлөөлөгч, эрүүл мэндийн ажилтнууд олон нийтэд өгөхгүй бол ийм таамаг газар авлаа. Н.Учрал хувь хүн гэхээсээ илүү олон мянган иргэдийн итгэл хүлээсэн төлөөлөл, улс төрч учраас олон нийтийн хяналт, хүндлэл дунд амьдардаг нэгэн. Тийм учраас иргэдийн мэдэх эрхийн хүрээнд мэдээлэл өгөхгүй байх аваас таамаг цуурхал газар авах нь.
