МУАЖ П.Цэрэндагва УБДС-ийн Кино драмын ангийг 1976 онд жүжигчний мэргэжлээр төгссөнөөс хойш Улсын Драмын Эрдмийн Театрт жүжигчнээр ажиллаж, монголчуудын зүрхэнд хоногшсон тайз, дэлгэцийн олон арван бүтээлд дүр бүтээсэн нэгэн билээ. Тухайлбал, тайзны “Хаан түүх” жүжгийн Хаан, “Жамуха” жүжгийн Чингис, “Тамгагүй төр” жүжгийн Эгрэгэ өрлөг, “Хүйтэн сэтий” жүжгийн Богд хаан, “Атга нөж” жүжгийн Хөхөчү зэрэг дэлгэцийн “Мандухай цэцэг хатан” киноны Ибрай тайш зэрэг дүрийг чадварлаг бүтээж, амилуулсан. Мөн орчин цагийн уран сайхны кинонуудад гол болон туслах дүр бүтээж, өөрийн ур чадварыг залуу хойч үедээ зааж, өвлүүлж яваа нэгэн юм.
Ард түмний хайртай жүжигчид, урлагийн тэнгэрт ёстой л нэг “од” болон гялалзаж театрын тайзан дээр өөрсдийн нэрийг тамгалж чадсан ахмад уран бүтээлчид болох МУАЖ П.Цэрэндагва, Д.Мэндбаяр нарын хайрын түүх ээдрээтэй, хачирхалтай эхэлсэн ч өдгөө хэн ч гайхахааргүй, харин ч хүндэлмээр, бахархмаар нэгэн сайхан гэр бүлийг бий болгосон билээ.
Тэгвэл Монгол Улсын Хөдөлмөрийн баатар, Ардын жүжигчин П.Цэрэндагва тамхинаас гарсан түүхээ хуваалцжээ. Тэрээр “Идээний дээж архи гэж хүндлэхийн цаана, ээ дээ наадах чинь их юм дагуулна шүү гэдгийг өвгөд маань бидэнд захиад үлдээснийг ойлгохгүй хүртэж явсан юм билээ.
Би нэг удаа ханьтайгаа хамт зураг авалтад явсан. Нэг өдрийн зураг авалтаа дуусгаад хүрээд ирлээ тамхи дуусчихсан. Хань ирдэггүй ээ. Санаа зовоод эхэлсэн. Гэтэл Эрдэнэтээс ирсэн унаанаас тортой юм барьчихсан “Энэ болох уу” гээд бүтэн хайрцаг Марлборо гэдэг тамхи аваад ирж. Өрхийн тэргүүн юм болохоор бас нэг бодол зурсхийж байна. Өдий болтол энэ хүнээр хоолоо бэлдүүлчихээд ийм зүйлд л явуулах гэж дээ бодсон. Нэгийг задлаад бусдадаа тараагаад дуусгасан. Тэрнээс хойш би тамхи татаагүй.
Эр хүний эрхэм чанар бол эрдэм ном сурахаас гадна ээж аавын минь өгсөн амин ухаан, ханиа сонгоод олчихсондоо өдий зэрэгтэй явж байна гэж боддог.”гэжээ.
