УИХ-ын гишүүн Ц.Цэрэнпунцаг цагтаа олны хүндэтгэлийг хүлээсэн бөх явсан. Харин өнгөрсөн жил завханчуудын итгэлийг өвөрлөн УИХ-ын гишүүн болсон. Гэвч тэр нутгийн иргэдийнхээ итгэлийг эвдэн хот, хүрээнд хөшөө дурсгалд мөнгө зарцуулах ёстой гэж “том” дуугарч бүр түүнийгээ зөвтгөж сууна.
Хэдэн өдрийн туршид иргэдийг бухимдуулсан 32 тэрбум төгрөгийн өртөгтэй “Богд Зонхова”-ын хөшөөг барихыг мань Ц.Цэрэнпунцаг гишүүн санаачилсан аж. Тэгээд ч зогсохгүй “Өвчин зовлонтой үед, ковидын үед хөшөө барилаа гэж иргэд нэлээн шүүмжилж байх шиг байна. Боловсрол, эрүүл мэндэд их наяд, их наядаар нь төсөв тавилаа шүү дээ. Үүнийг сайн анхаарах ёстой шүү.
Яг хэрэгтэй зүйлдээ зарцуулагдаж байна уу гэдэгт… Европт 4, 5 дахь давлагаа эхэлж байна. Цаашдаа 6, 7 гээд явахыг үгүйсгэхгүй. Бидний амьдрал үргэлжилж байна. Коронавирусын хажуугаар жуулчид ирээд юу үзэж харах уу. Өв соёлоо сэргээж, үзэж харах зүйл байх ёстой. Энэ том төсөл явах учиртай. Улсаас нэг ч төгрөг гараагүй. Хүмүүс өвдөж зовохоороо ганданг, хурим найраа хийсэн ч Жанрайсэг бурхандаа мөргөөд гардаг.
Тэгэхээр жуулчин ирсэн ч хамгийн түрүүнд Ганданд л очно. Тэгэхээр энэ газраа сэргээж, нүүр улайхааргүй болгох хэрэгтэй. Харин ч хятад компанид зарагдсан байсан газарт “Богд Зонхова” цогцолбор барих гэж байгаад баяртай байна. Монголоо алдах сонирхол хэнд байна вэ. Хэрэгтэй болоод л УИХ-аар шийдвэрлэсэн” гэх хариултыг өгсөн.
Уг нь мань хүн өдгөө завханчуудын эрүүл, аюулгүй амьдрал, тойргийнхоо хөгжлийн төлөө илүү ихийг хийхийн тулд УИХ-д суугаа. Тэгтэл ийн бурхны хөшөө барихын тулд улайран зүтгэж байна. Түүний энэ үйлдлийг зарим хүн хувь эзэмшдэг “Аспайр майнинг” компани болон уул уурхайн төсөлтэй холбон тайлбарлах болжээ.
Ц.Цэрэнпунцаг “Аспайр майнинг”-ийн 51 хувийг эзэмшдэг бөгөөд тус компани коксжих нүүрсний нөөцөөр Монгол Улсад хоёрдугаарт ордог “Овоот” төслийн 100 хувь, Жилчигбулагийн болон Мянганы нүүрсний төслүүдийг 100 хувь тус тус эзэмшдэг.
Тэр ч утгаараа “Овоот”-ын уурхай оршдог Хөвсгөл аймгийнхан газар шороогоо ухуулж сэндийлүүлэхгүй гэж багагүй тэмцсээр ирсэн. Тухайн үед орон нутгийн иргэд тус компани 2018 оноос Могойн голын нүүрсний ордыг ухахаар ажлаа идэвхжүүлж байна гэх мэдээлэл ч газар аваад байсан юм.
Тиймээс Хөвсгөлийн газар нутгийг ухаж, сэндийлэхийн тулд ёстой л нүглийн нүдийг гурилаар хуурав гэгч болж, мань Ц.Цэрэнпунцаг хотод бурхан барьж, хөдөөд уул ухаж, уурхайгаар ашиг олохоор зэхэж байна гэх болжээ.
Юутай ч шинжлэх ухаан хөгжсөн энэ цаг үед УИХ-ын гишүүн нь “Хүмүүс өвдөж зовохоороо ганданг, хурим найраа хийсэн ч Жанрайсэг бурхандаа мөргөөд гардаг” гээд яриад зогсож байгаа нь олон нийтэд зөв дадал суулгах гэсэн үйлдэл лав биш шүү.
Эх сурвалж: Erennews.mn
