Дуучин А.Түмэн-Өлзий уянгалаг хоолойтой, уран дуулдаг үеийнхээ дуучдын дундаас ялгарч шалгарсан дуучин. МУСТА А.Түмэн-Өлзий хоёр төрсөн ахыгаа, аавыгаа бурхны оронд үдсэн, амьдралын хал зовлонг эрт үзсэн бүсгүй. Одоо ганц үлдсэн ээжийгээ жаргаана гэж боддог гэдгээ ярьсан. Хөл хориогүй, дэлхий нийтээрээ цар тахалд нэрвэгдээгүй сайхан цаг үед ээжийгээ гадаад дотоодод их аялуулсан ачтай охин.
МУСТА А.Түмэн-Өлзий ид дуулж явсан, оргил үедээ нөхөртэй болж, охиноо төрүүлсэн билээ. Нөхөр Э.Амарсанаатайгаа фэйсбүүкээр танилцсан гэдэг. Тухайн үед Шведэд ажиллаж амьдарч байсан нөхөр нь Монголд шууд ирж, хамт амьдарч эхэлсэн. Тэд хайр сэтгэлээ ил тод илэрхийлж, хайрын гэрч болсон охин нь мэндэлсэн.
Сүүлдээ А.Түмэн-Өлзий нөхрийнхөө тухай дурсах, зураг хөргийг нь фэйсбүүктээ оруулах нь цөөрсөөр. Угаасаа алдаа оноогоо нууж хаагаад, амаа жимийгээд суудаггүй А.Түмэн-Өлзий нөхрөөсөө салж, ганц бие амьдарч байгаагаа удалгүй зарласан. Одоо зөвхөн охин, ээж хоёрынхоо төлөө амьдарч байгаа нь олны нүдэнд амьдардаг дуучин бүсгүйн үйл хөдлөлөөс ил харагддаг.
Тогтсон амьдралаа нурааж, үр хүүхдээ өнчрүүлэх хэнд ч амар биш. Тэглээ гээд насаараа зууралдах ч хэцүү. Ямар ч хүн хань ижлээсээ салж, тогтсон амьдралаа өөрчлөхөөр түр зуурын сэтгэл гутралд автах үе бий. Харин МУСТа А.Түмэн-Өлзий энэ хүнд үеэ давж, улам гэрэлтэн гялалзаж эхэллээ.