2019 оны хавар Онцгой байдлын сургалт явуулсан. Хэрвээ байгалийн гамшиг, газар хөдлөлт болбол нийслэлийн иргэд, төрийн байгууллагууд бэлтгэлтгүй байдаг. Юутай ч 30 жил хийгээгүй онцгой байдлын сургуулилт хийсэн сайн талтай ч сөрөг тал байгаа нь анзаарагдаж байлаа. Энэхүү сургуулилтанд зориулж улсын төсөв, нийслэл, дүүргийн төсвөөс гарч байгаа нийт зардал нь 2,4 тэрбум гэж яригдаж байв.
Таван өдрийн сургалтын зардалд 2 тэрбум гаруй төгрөг зарцуулсан гэвэл үнэхээр их тоо. Харин энэ жагсаал сургуулилтын үеэр бүх дарга нэр овог нэрээ биччихсэн хээрийн алаг эрээн хувцас, онцгой байдлын хөх хувцсаар жигдэрсэн. Нийслэл, дүүргийн дарга, албан тушаалтнуудын өмссөн хувцсанд гэхэд л 500 сая төгрөг зарцуулсан тооцоо гарчээ. Мөн 4400 хүнийг ажлын ажлын өдөр, өдөр бүр хоёр цаг жагсаалын бэлтгэл хийлгэж байж саяны парадыг хийсэн байна. Энэ жагсаалд нийт 403 сая төгрөгийн зардал гаргасан гэж тооцоо гаргасан байна.
Одоо Монгол дахь цар тахлын дэгдэлтийн нэг содон зүйл нь бүх шатны дарга нарын “албаны” хувцасны гангараа юм. УОК, НОК-ийн гишүүдээс эхлээд сайд, хотын дарга болон Засаг дарга нар гээд сэтэртэй болгон десант хувцас, малгайгаар жигдрэх болсон. Үүнээс дээд шатныхан нь үнэтэй каракуль малгай, захаар гангарч байгааг НОК-оос харж болно.
Тус комисс өнгөрсөн онын 12 дугаар сард гишүүдийнхээ хувцаслалтанд 31 гаруй сая төгрөг зарцуулжээ. Үүнээс дарга буюу каракуль малгайд таван сая, мөн каракуль захад 3,6 сая төгрөг зарцуулсан байна. Бүх гишүүддээ нэг бүр нь 165 мянган төгрөгний гутал тарааж үүнд 5,2 сая төгрөг заржээ.
Дараа нь ахин 18 сая төгрөгийг “НОК-ын гишүүдийн хувцасны зардалд” хэмээн шилжүүлсэн байна. НОК-ийн комиссын гишүүд партай дулаан хурлын өрөөндөө хуралдахдаа гутал хувцсаа төсвийн мөнгөөр аван гангарч байхад, дөрвөн есийн хүйтэнд дөнгөж төрсөн эхийг гэрийн халаад, таавчигтай нь дөрвөн есийн хүйтэнд эмнэлэг дамнуулан суужээ. НОК-ийн гишүүд ээ, энэ шударга, хүнлэг, ардчилсан явдал уу?
