-ЕРӨНХИЙЛӨГЧ ЭРХ МЭДЛЭЭ БУЛААЛГАН ХӨНГӨЛҮҮЛСЭН БУХ БОЛОВ-
УИХ-ын дарга Ц.Нямдорж ашиг малтмалын хуулинд нууцаар заалт оруулаад өчиггүйгээр огцорч байж билээ. Түүнтэй адилхан АН-ын дүрмэнд захиалгаар хулгайн заалт (Одоогийн Ерөнхийлөгч өрсөлдөгчгүй дэвшинэ гэх) оруулсан Ц.Тувааныг зайлуулж арга хэмжээ авах ёстой юм. Унхиагүй, сул дорой болсон Ардчилсан намд дүрэлзээд босоод ирэх залуус алга. Бүгд л фракци бүлэглэлийн ая талыг олох гэсэн гэмгүй царайлж байгаад 2024 оны улс төрийн сонгуульд азаа үзэх хүсэлтэй нөхдийн бөөгнөрөл байх шив дээ.
Хуучин цагт гэмээр үед бол хувьсгалч гишүүд хүний өөрийн ийм хулгайг (Ерөнхий сайд Ж.Наранцацралт оросуудад захиа бичээд огцорч билээ) тэвчин өнгөрөөхгүй байсан болов уу. Гэр орныхоо бууриа зараад гудамжинд гарч баян Лу-гийн хатавч бараадан хоног төөрүүлэх АН зориг зүрхгүй сул дорой болжээ.
Уг нь ийм нам байгаагүй юм, ийм болгосон нөхөд УИХ-д сууж байгаа дуулдана. АН-ын даргаар С.Эрдэнэ эргэн ирсэн нь хязгаaргүй улс төрийн уналт үргэлжлэх дохио, дуудлага юм.
Мөн Ц.Элбэгдоржийн туслах асан Ц.Оюунгэрэл Ерөнхийлөгчийн сонгуульд нэр дэвшихээ илэрхийлсэн нь мөн уналтын шинж тэмдэг, арга барил юм.
С.Эрдэнийн хувьд ялагдлаа хүлээн зөвшөөрөөд алга болсон хэрнээ зургаан сарын дараа гэнэт гарч ирлээ. Энэ юуг харуулав гэхээр тэр айдсаа дараад асуудалгүй болоод иржээ. Нөгөөтэйгүүр цаг үеэ мэдэрсэн улс төрчийн хувьд томоохон тоглолтод орж улс төрийн тохироо хийх нь дээ.
Тэрээр одоогийн Ерөнхийлөгч Х.Баттулгын эсрэг зогсож байгаа мэт боловч эцсийн үр дүндээ тэд тохироо хийнэ.
С.Эрдэнэ өөрийн талын хүнд намын тамгаа шилжүүлэх, шүүх, цагдаа дээрх асуудлаа шийдүүлэх болов уу. Бас хазааранд нь Баянгол дүүрэг дээр “Мөнхийн хаанчлалаа” эргүүлэн авахыг хүсэх биз. Тэгэхээр Х.Баттулга С.Эрдэнэтэй тохирохгүйгээр Ерөнхийлөгчид нэр дэвших боломжгүй учир хүссэн хүсээгүй нэг ширээнд сууна.
Ц.Оюунгэрэлийн хувьд түүнд Ерөнхийлөгчид дэвших хүсэл ч, санхүүжилт ч байхгүй. Түүнд нэг сайн чанар байдаг нь нөхөрлөлдөө үнэнч зан юм. Ц.Оюунгэрэлийг хүн амины хэрэгт сэжиглэгдэн Төв аймгийн мөрдөнгөөс гаргаж авсан хүн бол Ц.Элбэгдорж шүү дээ. Тэгэхээр тэр хүнд насаараа талархаад баршгүй өртэй. Ц.Элбэгдорж ашигтай цаг хугацааг хүлээж байгаад Ц.Оюунгэрэл гэдэг “тэмээ”-гээр Х.Баттулгыг “дуглаж” байна.
Ерөнхийлөгч Х.Баттулгын хувьд Ц.Элбэгдоржтой дайтах биш түр зуур гар барих шаардлагатай тул шүүх дээрх зовоосон асуудлыг нь зохицуулж АН доторх түүний талын дэмжлэг авахыг оролдоно. Тэр үед Ц.Элбэгдорж Х.Баттулгын зам дээрх Ц.Оюунгэрэлийн нэрийг татуулах юм уу, буулт хийлгэнэ. Улс төр гэдэг тэр чигээрээ тохироо бөгөөд хэзээ хаана давших, зогсохоо тэд мэдэж байгаа учраас тийм тайван.
МАН-ын хувьд Ерөнхийлөгчийн бүх эрх мэдлийг УИХ дахь давуу байдлаа ашиглан Ерөнхий сайд дээр овоолчихлоо. Хамгийн сүүлд л гэхэд Ерөнхийлөгчийн хүчтэй болгодог Шүүх засаглалыг булаан авч “хөнгөлүүлсэн бух” болгов. Ийм учраас У.Хүрэлсүх тохироо ёсоор Ерөнхийлөгчийн сонгуульд нэр дэвшихээс татгалзаж Г.Занданшатар урагшаа түлхэж мэдэх юм. Ийм прогноз байна, та юу бодож байна.