О.Баасанхүү гишүүн МАХН-аас гарна гэдгээ мэдэгджээ. Гэхдээ албан ёсоор намаасаа гарах өргөдлөө өгөөгүй байна. Тэрээр өнгөрсөн хугацаанд МАХН-ын дарга Н.Энхбаяртай намын удирдлагын эрх мэдлийг булаацалдаж, эв түнжин муутай байсан. Мөн УИХ-ын сонгуулийн тухай хуулийг хэлэлцэж батлах үеэр авлига, албан тушаалын хэргээр ял шийтгүүлсэн хүмүүсийг нэр дэвшүүлэхгүй болгоход шууд биш ч нөлөө үзүүлсэн хүн нь О.Баасанхүү яалт ч үгүй мөн. Тиймээс намынх нь дарга Н.Энхбаяр түүнд ихээхэн дургүйцсан бололтой.
Энэ талаар УИХ-ын гишүүн О.Баасанхүү “Н.Энхбаяр гэдэг хүн 11 удаа намайг МАХН-аас хөөсөн. Хамгийн сүүлд Сонгуулийн тухай хуульд авлига, албан тушаалын хэрэгтнийг нэр дэвшүүлэхгүй гэдэг заалтыг намайг хөөцөлдөж оруулсан гэж гүтгэлээ. Би тэр заалтыг нь дэмжээгүй, тэр асуудлыг хэлэлцсэн чуулганы хуралдаанд нь ч оролцоогүй. Гэтэл намайг гүтгэсэн. Ер нь Н.Энхбаяр гэдэг хүн намайг олон удаа намаасаа явуулахыг хүсэмжилж байгаа. Тиймээс би улс төрийн шийдвэр гаргахаар болсон. Одоогоор албан ёсоор намаасаа гарах өргөдлөө өгөөгүй байна. Намаасаа гарлаа гэхэд намууд санал тавибал бодож үзнэ” гэжээ.
Хэрвээ О.Баасанхүү намаасаа гарвал МАХН парламентад суудалгүй болж үлдэнэ. Мөн намын дарга Н.Энхбаярыг авлига, албан тушаалын хэргээр ял сонссоноор нь сонгуульд нэр дэвшүүлэхгүй бол дараагийн парламентад ч МАХН суудалгүй болж мэднэ. Тиймээс МАХН-ын хувьд О.Баасанхүүг яаран намаасаа гаргахгүй болов уу. Харин ийм эгзэгтэй үед О.Баасанхүү намаасаа гарна гэж мэдэгдсэн нь намдаа байр сууриа тогтоох гэсэн оролдлого байж мэднэ. Сануулахад, УИХ-ын гишүүн О.Баасанхүү өнгөрсөн оны зургаадугаар сард Үндсэн хуульд нэмэлт, өөрчлөлт оруулахтай холбогдуулан УИХ дахь АН-ын зөвлөлтэй хамтран ажиллах хүсэлтээ өгч байлаа. Харин АН-ын зүгээс түүний хүсэлтийг хүлээн авч, хамтран ажиллахаар болсон. Үүнээс үзвэл О.Баасанхүү сөрөг хүчин АН-д элсэх сонирхолтой байж болох юм. Гэхдээ АН-ын хувьд, тус намын дарга С.Эрдэнийн хувьд ч түүнийг намдаа элсүүлэх эсэх нь ихээхэн эргэлзээтэй. Учир нь, АН-ын дарга С.Эрдэнэ, гишүүн О.Баасанхүү нар хоорондоо зөрчилтэй гэдгээ УИХ-ын нэгдсэн чуулган болон Байнгын хорооны хуралдааны үеэр ил тод илэрхийлдэг. С.Эрдэнэ чуулганы хуралдааны үеэр “Ардчилсан нам ард түмний дуу хоолой хүсэл шаардлагын дагуу жагсаал зохион байгуулж байгаа. Хэнтэй асуудал ярихаа таниар заалгахгүй. Микрофон ашиглаад хүн доромжилж байдгаа боль. МАХН-ыг эрх баригч намтай нийлж өөрөө л бужигнуулсан. О.Баасанхүү чи дуугүй байгаарай, наад мэдрэлээ шар хаданд очиж үзүүл” хэмээн бухимдсан нь үүний жишээ. Харин үүнээс нэг сарын дараа тэд нэгдэж ажиллахаар болсон нь УИХ-д бүлэггүй болсон АН, Үндсэн хуулийн нэмэлт, өөрчлөлтөд хүч сэлбэн оролцох ажиллагаа байсныг үгүйсгэхгүй.
