Москва хотноо болсон “Оросын эрчим хүчний долоо хоног” олон улсын чуулга уулзалтад Эрчим хүчний сайд Б.Найдалаа, Аж үйлдвэр, эрдэс баялгийн сайд Г.Дамдинням тэргүүтэй Монгол Улсын төлөөлөгчид оролцлоо.
Эрчим хүчний сайд Б.Найдалаагийн хувьд ОХУ-ын Эрчим хүчний сайд С.Е.Цивилёв болон холбогдох албаны хүмүүстэй уулзаж, хоёр орны эрчим хүчний салбарын хамтын ажиллагааг өргөжүүлж, шинэ түвшинд гаргах чиглэлд санал солилцлоо. Мөн “Уур амьсгалын прагматизм: технологийн манлайлал, байгаль орчинд ээлтэй түлш ба COP31-ийг угтсан олон улсын яриа хэлэлцээ” сэдэвт өндөр түвшний хэлэлцүүлэгт илтгэгчээр оролцож, Монгол Улсын эрчим хүчний салбарын хөгжлийн бодлого, цаашдын зорилт, хамтын ажиллагааны боломжийн хүрээнд байр сууриа илэрхийлсэн юм.
Айлчлалын үеэр Дулааны III цахилгаан станцын өргөтгөл, шинэчлэлийн төслийн үндсэн зураг төслийг боловсруулах тухай гэрээнд “ДЦС-3” ТӨХК-ийн гүйцэтгэх захирал Б.Сандуйжав, “Интер РАО Экспорт” компанийн захирал М.Е.Сергеев нар гарын үсэг зурж баталгаажуулсан онцлох үйл явдал тохиолоо.
Энэхүү төсөл хэрэгжсэнээр “ДЦС-3”-н цахилгаан үйлдвэрлэх хүчин чадал 252 МВт-аар нэмэгдэж, 84,000 орчим өрхийг цахилгаанаар хангах шинэ эх үүсвэр бий болно. Мөн дулааны хүчин чадал цагт 300 Гкал-аар нэмэгдэж, 30,000 орчим өрхийн дулааны хэрэгцээг бүрэн хангах юм. Тодруулбал, одоо байгаа цахилгаан эрчим хүчний чадал 2.3 дахин, дулааны эрчим хүчний чадал 1.5 дахин тус тус нэмэгдэнэ.
Мөн албан ёсны уулзалтаар Эгийн голын усан цахилгаан станцын төслийг шуурхайлах талаар яриа, хэлэлцээр өрнүүллээ. 2025 оноос эхэлсэн “Эгийн голын УЦС төслийн Байгаль нуур болон Сэлэнгэ мөрөнд үзүүлэх болзошгүй нөлөөллийн байгаль орчны иж бүрэн үнэлгээ” сэдэвт Монгол-Оросын хамтарсан судалгааны тайлангийн үр дүнг хэлэлцэх уулзалт өнгөрөгч долоо хоногт мөн ОХУ -д зохион байгуулагдаж, хоёр талын эксперт, ажлын хэсгээс Эгийн голын УЦС-ын ашиглалтын горимыг экологийн шаардлагад нийцүүлэн тогтоох зарчмын боломжтой гэсэн дүгнэлтээ танилцуулсан юм. Энэхүү дүгнэлтийг энэ оны арванхоёрдугаар сард Монгол, Оросын Засгийн газар хоорондын хуралдаанд танилцуулахаар төлөвлөжээ.
Ийнхүү Эгийн голын усан цахилгаан станцын төсөл олон жилийн дараа гацаанаас гарч, бодит ажил хэрэг болох боломж нөхцөл бүрдэж байна.
Discussion about this post