Монголын Шатахуун хэрэглэгчдийн холбооны Гүйцэтгэх захирал Б.Сайнбаяртай ярилцлаа.
-Шатахууны үнэ 300 төгрөгөөр нэмэгдэж маргаашнаас эхлээд өргөн хэрэглээний барааны үнэ нэмэгдэнэ гэсэн яриа гарч байна?
-Дэлхийн зах зээл дээр коронавирусээс үүдээд нефтийн үнэ унасан ч эргээд өсч байна шүү дээ. Яг өнөөдрийн байдлаар барелль нефтийн үнэ зах зээл дээр 75 ам доллар болчихсон байна. Нэг барелль нефтийн үнэ 10 ам.доллар хүртэл унасан гэдгийг хэлэх хэрэгтэй. Өнөөдрийн хувьд ОХУ-ын “Роснефть” компани нэг литр шатахуунаа 661 ам.доллар гэж зарлачихлаа. Тэгэхээр энэ удаагийн шатахууны үнэ зах зээлийн зарчмаараа өсч байгааг хэлэх хэрэгтэй.
-Өргөн хэрэглээний бараа нэмэгдэх нь зөв үү?
-2020 оны 4-р сарын 15-нд шатахууны үнэ 300 төгрөгөөр буурсан. Энэ үед өргөн хэрэглээний бараа таваарын үнэ буурсан уу. Шударга өрсөлдөөн хэрэглэгчийн төлөө газар буулгаж чадсан уу гэж асуумаар байна. Шатахуун хэрэглэдэггүй малын махныхаа үнийг хүртэл барьж чадаагүй гэдгийг хэлэх хэрэгтэй.
-Шатахууны үнэ нэмэгдсэн сургаар иргэн Б.Жагар Засгийн газарт шаардлага хүргүүлж байна лээ?
-Харсан. Тэр шаардлагыг нь Шударга өрсөлдөөн Хэрэглэгчийн төлөө газрын дарга Б.Бат-Эрдэнэ талархан хүлээн авч “Ажлын хэсэгт Б.Жагарыг оруулна” гэдгээ зарлаж байна. Яг үнэнийг хэлэхэд импoртлогчид газар дээрээс нь 1440 төгрөгөөр авчихаад алдагдалтай зарах л болов уу. Харин ч 600 төгрөг нэмж зарахаа мэдэгдэж байсан импортлогчид Засгийн газартай хэлэлцээрт орж 300 төгрөгөөр борлуулж эхэлсэн болов уу. Ам.долларын ханш өсөх аваас шатахууны үнэ нэмэгдэх дахиад магадлалтай.
-Шатахууны үнэ нэмэгдэх нь зах зээлийн зарчим уу?
-Дэлхий дээр нефтийн үнэ өсч байгаа үед шатахууны үнэ нэмэгдэхээс өөр аргагүй шүү дээ. Муу нэртэй шатахуун импортлогч нарыг буруутгах аргагүй ээ.
-Шударга өрсөлдөөн хэрэглэгчийн төлөө газрын дарга Б.Бат-Эрдэнэ “Үнийн өсөлтийг шалгах ажлын хэсэг гарна” гэсэн шүү дээ ?
-Зүгээр л попролт шүү дээ. Шатахууны үнэ Ерөнхийлөгчийн сонгуулийн өмнө 600 төгрөгөөр нэмэгдэх гээд тэвдүүлж байсан. Үнэ нэмэгдэнэ гэдгийг Б.Бат-Эрдэнэ мэдэхийн дээдээр мэдэж байсан шүү дээ.
-Та бүхэн Засгийн газартай хамтарч шатахууны чанарт шалгалт хийсэн. Тэр ажлын хэсгийн дүгнэлт яаж гарсан вэ?
-2021 оны 3 сард ШӨХТГ-ын дарга Б.Бат-Эрдэнийн тушаалаар ажлын хэсэг гарч шалгалт хийсэн. Гэвч эрхэм дарга одоо хүртэл ажлын хэсгийн шалгалтын дүнгээ танилцуулахгүй байгаа нь эргэлзээ төрүүлдэг.
-Шатахууны үнийн эсрэг та бүхнийг жагсах болов уу гэсэн хүлээлт байх шиг байна?
-Харин тийм ээ. Цаад учир шалтгааныг нь мэдэж байгаа учраас аль нэг талыг барьмааргүй байгаа юм. Шатахууны үнэд төрийн оролцоо их байсан гайгаар өнөөдрийн хүнд байдлыг бий болгосон. Шатахууны үнэ хямдарч байх үед “Нөөцлөх хэрэгтэй” гэсэн санал хүртэл хүргүүлж байлаа. Энэ удаа бол Монголчууд “Үнэнтэйгээ нүүр тул” гэмээр байна. Долдугаар сарын шатахууны үнэ гараагүй байгаа ч өсөх төлөв байгааг шинжээч нар мэдээлсэн байна лээ. Биднээс хамаарахгүй, бүр хулхи тэмцэгч нар хүртээлгүйгээр дэлхий эргэж байна шүү дээ.
Barimt.com
