2020 оны орон нутгийн сонгуулиар Хөдөлмөрийн Үндэсний Намын Нийслэлийн намын хороо нь хоёр хуваагдсан, шүүх цагдаадаа тулсан байдал үүсч байлаа. Энэ асуудлын талаар Нийслэлийн намын хорооны дарга О.Бямбадэлгэртэй ярилцлаа.
-Орон нутгийн сонгуульд оролцож чадаагүй бил үү?
-Хөдөлмөрийн Үндэсний намыг үүсгэн байгуулагч бидний хэдэн нөхөд орон нутгийн сонгуульд оролцож чадаагүй нь үнэн. Учир юу гэвээс Хөдөлмөрийн Үндэсний намыг булаан эзэлсэн Б.Найдлаа, Т.Доржханд мэтийн үл бүтэх этгээдүүдээс болсон юм. Эдгээр нөхөд “Хотонд ирээд хонь манайх” гэдэг шиг хаалга тогшин гуйж орж ирчихээд хулгай луйврын аргаар намын дарга болсон байдаг. Тэгээд үүсгэн байгуулагч нарыг орон нутгийн сонгуульд орох боломжийг хаасан.
-Хөдөлмөрийн Үндэсний намаас шүүхэд өглөө гэж мэдээ байсан?
-Одоогоор дарга гээд сагсалзаад яваа Б.Найдлааг гишүүд сонгоогүй. Б.Найдлаа тэргүүтэй нөхөд Намын төв хорооны гишүүдийн гарын үсгийг хуурамчаар зурсан байдаг. Юу гэсэн үг вэ гэвэл хуурамч тамга, гарын үсэг, албан бланк ашиглан Б.Найдлаа Хөдөлмөрийн Үндэсний намын дарга болсон. Энэ маргаан гажуудлыг засаагүй цагт цаашаа явах боломжгүй юм. Тийм учраас намын гишүүд шүүхэд гомдол гаргасан. Намын дарга С.Боргил ч гэрчээр мэдүүлэг өгөхөөр очсон. Та бүхэн мэднэ дээ эрх мэдлийн төлөөх тэмцлээс үүдээд 2016 оны УИХ-ын сонгуульд манай нам орж чадаагүй. Улсын дээд шүүх дээр Т.Ганболд, С.Ганбаатар нарыг бүртгүүлэх гэхэд удаа дараа бүтээгүй. Тийм атлаа хуурамч гарын үсэгтэй тамгатай Б.Найдлааг болохоор бүртгэсэн. Одоо бодоход Б.Найдлаа нар нам булаах гээд хор хутгаад байж.
-Улсын Дээд шүүхээс та бүхний гомдлыг авч хэлэлцсэн үү?
-Б.Найдлаа нарын нөхөд Улсын Дээд Шүүх дээр ирэхгүй, бас нотлох баримтаа өгөхгүй байгаа юм Өөрөөр хэлбэл хуурамч гарын үсэгтэй тогтоол, шийдвэрээ авчирч өгөхгүй энэ тэрүүгээр гүйгээд байна. Үнэхээр шударга, боловсролтой, хууль дээдлэдэг юм бол “Би Улс төрийн товчооноос сонгогдсон гээд тэр баримтаа аваад ир л дээ. Тийм зориг байхгүй хэрнээ “Манай оффиссыг цар тахлаар далимдуулан битүүмжилсэн, оруулахгүй байна ч гэх шиг. Хүн үнэмшихгүй шалтаг хэлээд тойрч зугтаах юм.
-Нам булаасан эсэхээ тодруулчихгүй дээ?
-Б.Найдлаа чинь аль билээ нэг намын гишүүн байсан нөхөр шүү дээ. Нам намын үүд онголзуулсан нөхөд ийм аюултай байдаг гэдгийг ойлгож авлаа. Б.Найдлааг нэн яаралтай шүүх дээр баримтаа өг, асуудлаа шийдье гэдгээ энэ ярилцлагаар дамжуулж байгаа юм. Шүүхийн зүгээс тухайн үед хуурамч гарын үсэг, тамга ашигласан Б.Найдлааг Хөдөлмөрийн Үндэсний намын даргаар томилсон алдаа бий. Энэ алдаагаа нуух, хаацайлах зорилгоор архиваас баримт гаргаж өгөхгүй байх, арга саам хийх явдал байгааг ч дашрамд хэлье.
-Шүүх хурал товлогдсон уу?
-Хуурамч Жа лам гэдэг шиг Б.Найдлаа айсан хүнд аргал хөдлөнө гэдэг баахан өмгөөлөгч авчихсан явна лээ. Айгаагүй бол бичиг баримтаа сугавчилаад гүйгээд ирэх байлаа. Шударга ёсноос айсан байдалтай байгааг шүүх харж байгаа биз дээ. Бүр сүүлдээ гадаад руу оргон зайлах вий дээ гэж бодох боллоо. Цар тахлын үед гээд шүүх бас товоо гаргаагүй байна. Шүүхийн шийдвэр гарсан гараагүй Хөдөлмөрийн Үндэсний Намын гишүүд удахгүй Хэвлэлийн хурал хийхээр төлөвлөж байлаа. Гэтэл Б.Найдлаа луйвар булхай нь илэрэхээс айж ХҮН-ын даргын албан тушаалдаа Т.Доржхандад шилжүүлсэн гэж зарлав.
-Юу болов оо?
-УИХ-ын сонгуульд 5,8 тэрбум төгрөг зарцуулж сонгогдсон Т.Доржханд руу ХҮН-ыг шилжүүлсэн нь адуу гулгуулдаг, мөнгө угаадаг шиг гэмт хэрэг юм. Б.Найдлаа шүүх хурал дөхөхөөр Ковид гараад оффистой орж чадахгүй байна гээд хойшлуулчихдаг. Гэтэл цар тахалтай үед ХҮН-ыг Т.Доржханд руу шилжүүлж байгаа нь ямар ёс зүйтэй вэ гэдгийг нь харууллаа. Гишүүнгүй нам болсон гэж зарлаад байсан хэрнээ Доржханд сонгогдлоо ч гэх шиг. Ямартай ч Ковидын үед цугларч хурлаа хийгээгүй.
- -ХҮН-д эрх баригч нар саамшираад байгаа юм биш үү?
-Эрх баригч намын тухайд ХҮН-аас Ерөнхийлөгчийн сонгуульд санал хуваах хүн дэвшүүлнэ. Магадгүй Ц.Оюунгэрэл ч юм уу. Т.Доржханд нарын ард МАНАН бүлэглэл байгаа гэдгийг улс төр гадарладаг эрхмүүд мэднэ шүү дээ.
