Засгийн газрын Хэрэг эрхлэх газрын дарга Л.Оюун-Эрдэнийн Оюутолгой компанийн удирдлага, эзэдтэй (“Өглөө” кино дээр “Бишээ бүүр цаад эзэд гэдэг шиг”) тулж очсон бололтой. Яг үнэндээ Pио Tинтo компанийн зүгээс ийм буулт өмнө хийж байгаагүй юм. Тэд Оюутолгойгоос Монгол Улсад орох ашгийг нэмэх талаар ярилцах, яриа хэлэлцээрээр асуудлыг шийдэх хэлбэрийг санал болгож байгаа юм.
Манай талаас Дубайн гэрээг цуцлах, далд уурхайн бүтээн байгуулалтын зардал хэтэрсэнд шалгалт оруулах хүсэлт тавьсан. Pио Tинто талаас Дубайн гэрээг цуцлахыг зөвшөөрөхгүй байгаа бөгөөд далд уурхайн бүтээн байгуулалтын зардал хэтэрсэн асуудлыг шалгах ажлыг хэсэг байгуулахыг хүлээн зөвшөөрчээ.
Дубайн гэрээний хувьд 15 банкнаас зээл авсан асуудал яригдах учраас Pио Tинтo компани эсэргүүцэж байгаа бололтой. С.Ганбаатар санхүүгийн шалгалт оруулах, Дубайн гэрээг цуцлах талаар ярихад инээдэг байсан талууд ерөнхийдөө хүлээн зөвшөөрч эхэллээ. Оюутолгойн гэрээ бол хөдлөшгүй цайз хэрэм биш учраас өөрчлөлт оруулах үүд хаалгыг нээж чадлаа гэх үндэс байна.
Цуцлана гэхээсээ илүүтэйгээр олон олон заалтад өөрчлөлт оруулах, цаг үетэйгээ хөл нийлүүлсэн хамтын ажиллагааны эхлэл тавигдаж байна уу даа. Одоогийн байдалд гэрээг бүхэлд цуцлана гэж дайрах зөв тактик ч байж мэднэ. Хамгийн осолтой нь УИХ-аас гардаг ажлын хэсэг шалгалтын дүгнэлтээ Оюутолгойн талд мэдээлдэг, зөрчил дутагдал дээр дуугүй өнгөрдөг.
Шалгалтын ажлын хэсэгт УИХ-ын гишүүд орох сонирхолтой байдаг ч нөгөө талд үйлчилдаг гашуун түүх бий. Татварын өр тавингуут Сангийн яам дээр цуцладаг, шүүх дээр хэрэгсэхгүй болгох төлөөний нөхдүүд байдаг. Үр хүүхдээ Pио Tинтo компанийн зардлаар гадаадад сургасан, тэднээс ивээн тэтгэлэг авдаг улс төрчид энэхүү ажлын хэсэгт орж ирсэн гашуун түүх бийг санагтун. Л.Оюун-Эрдэнийн хувьд үе үеийн Засгийн газрын хийж чадаагүй хаалгыг онгойлгож нөгөө талтай нэг ширээнд суулаа.
Шатраар бол Оюун-Эрдэнэ ноёныг нь шалж тэргийг нь идэхээр шахамдуулж эхэлсэн харагдана. Нөгөө тал хамгаалах тутам Бэрсийн хүү урагш зүтгэж өрсөлдөгчийнхөө тал руу ороод иржээ. Хэрхэн зөв нүүхээс хожил хожигдол хамаарах учраас өрөгт тоглогчоос илүүтэйгээр үзэгчид илүү нөлөө үзүүлдэг билээ. Илэрхий довтолж буй Л.Оюун-Эрдэнийг харлуулах, унагах гадна дотны захиалга ч явж мэдэхээр харагдана