Сүүлийн үед сошиал орчинд ХӨСҮТ-ийн захирал Д.Нямхүүг хэвтэн, эмчлүүлж буй коронавирусийн халдвартай өвчтөнүүдийг Цэргийн төв эмнэлэг рүү шилжүүлсэн асуудлаар Эрүүл мэндийн сайд Т.Мөнхсайхан, ХӨСҮТ-ийн захирал Д.Нямхүү нар үл ойлголцож үүнээс үүдэлтэйгээр нөхцөл байдал хүндэрсэн тухай мэдээлэл олон нийтийн сүлжээнд тархсан.
Албаны эх сурвалжийн мэдээлснээр ХӨСҮТ нь голомт болсон бөгөөд коронавирусийн халдвартай иргэдийг гардан эмчилж, сувилж буй эмч, сувилагч, ажилчид нь нэг буюу түүнээс дээш удаа дахин, дахин өөрсдөө халдвар авч буй асуудлыг засч, цэгцлэх зорилгоор тус эмнэлэгт хэвтэн эмчлүүлж буй халдвартай иргэдийг Цэргийн төв эмнэлэг рүү шилжүүлэхээр болжээ. Эмч, ажилтнууд халдвар авах үйл явц давтагдсаар буй бөгөөд дахин, дахин өвчилж буй нь ноцтой асуудал дагуулж буй учир энэ шийдвэрийг гаргахад хүргэсэн гэх. Зөвхөн эмч, сувилагч ч бус өвчтөнүүд ч дахин халдвар авах эрсдэл өндөр байгаа аж.
Эрүүл мэндийн сайд Т.Мөнхсайхан нь дээрх шийдвэрийг гаргахдаа Хууль зүй, дотоод хэргийн яам, Эрүүл мэндийн яам, Мэргэжлийн хяналтын ерөнхий газрын хамтарсан багын энэ сарын 06-ны өдөр ХӨСҮТ-д хийсэн шалгалтын дүнд үндэслэсэн гэв.
Тус гурван байгууллагын ХӨСҮТ-д хийсэн дотоод, хяналт шалгалтын дүн өнгөрсөн баасан гаригт /2020.12.18/ гарсан бөгөөд хариу нь маш ноцтой аж. Тодруулбал, ХӨСҮТ-д хийсэн шалгалтаар ажилчдын халдвар, хамгаалалт муу, эмнэлгийн орчин маш бохир, хэвтэн эмчлүүлэгчдийн тасаг стандартын шаардлага хангаагүй, халдвар тархах эрсдэл өндөр нь тодорхой болсон аж.
Тэгвэл Хууль зүй, дотоод хэргийн яам, Эрүүл мэндийн яамны хамтарсан дотоод хяналтын шалгалтаар ХӨСҮТ-ийн захирал Д.Нямхүү нь санхүүгийн нэлээн олон зөрчил гаргасан нь ил болсон гэх мэдээлэл байна. Тодруулбал, ажилчдын урамшуулал, нэмэгдэл цалин, иргэдээс өгсөн хандивын зарцуулалт дээр цох дутсан, хувьдаа ашигласан байж болзошгүй асуудлууд байгаа аж. Энэ асуудлаар түүнийг АТГ-т шалгаж буйтай холбоотойгоор ажлаас нь түр түдгэлзүүлэхээр Эрүүл мэндийн яаманд яригдаж эхлээд байгаа юм.
Тэгвэл сошиал орчинд иргэд “ГАЛЫН ЗУРВАСТ” ажилласаар өнөөдрийг хүрсэн энэ хүний сандал ширээ хэнд хэрэгтэй болоо ??? Түүний сандал хэнд хэрэгтэй болов? “Иргэдэд одоог хүртэл зүрх сэтгэлтэй ажилладаг нь хэрэгтэй байна” хэмээж түүнийг огцруулахыг эсэргүүцэж байгаа юм.
Үнэхээр л Д.Нямхүүг халаад Корона алга болчихдог бол наадах хүн чинь өөрөө аль хэдийнэ ажлаа өгчих сэтгэлтэй хүн шүү
