Монгол улс дотооддоо коронавирусын халдвар алдсанаас үүдээд сүүлийн өдрүүдэд сошиал орчинд Нийслэлийн Засаг дарга болон Дархан хотын Засаг дарга нарыг харьцуулсан мэдээллүүд давалгаалж байгаатай холбогдуулан, Нийслэлийн төрийн үйлчилгээ, төрийн захиргааны байгууллагуудад 10 орчим жил ажиллаж буй жирийн нэг төрийн албан хаагчийн хувьд энэхүү бичвэрийг буулгаж нүүр номын найзууддаа хүргэж байна. Нийслэл Улаанбаатар хотын өдөр тутмын асуудлууд буюу Монгол улсын нийт хүн амын тал нь болсон 1.5 сая орчим иргэдийн амьдралыг зохицуулахаар Ж.Батбаясгалангаар удирдуулсан Нийслэлийн Иргэдийн Төлөөлөгчдийн хурал, Д.Сумъяабазараар удирдуулсан Нийслэлийн Засаг даргын Тамгын газар, Т.Гантөмөрөөр удирдуулсан Нийслэлийн Захирагчийн Ажлын алба болон нийслэлийн 34 агентлаг, харьяа байгууллагуудын удирдлагууд болон нийт ажилтан, албан хаагчид ажилладаг. Тэр дундаа төрийн тусгай салбарын байгууллагуудынхан маань ёстой л өдөр шөнөгүй, өвдөх, зовох, амрах эрхгүй ажиллаж, нийслэлчүүдийгээ эрүүл, аюулгүй, ая тухтай амьдруулахын тулд өргөсөн тангарагаа үүрэг, тушаал мэт бодож ажилладаг.
Улаанбаатар хотын удирдлагууд болон нийслэлийн харьяа байгууллагуудын төрийн албан хаагчид бид сэтгэл, итгэл, хөдөлмөр, бүтээл гээд өөрт байгаа бүхий л зүйлээ дайчлан энэ хүнд цаг үеийг даван туулахаар нэг зорилготой, нэг сэтгэлтэй, нэгдмэл ойлголттой зүтгэж байгаа. Өнөөдрийн байдлаар коронавирус буюу (Covid-19) нь дэлхийн 218 улс, бүс нутагт тархаж нийт 56.623.643 иргэд халдварлаж, 1.355.963 хүн халдварласнаасаа болж нас барж байгаа ийм л хүндхэн цаг үед бид амьдарч байна. Бидний сайн мэдэх, очиж үзэхсэн, амьдарч үзэхсэн гэж бодож, мөрөөдөж явсан олон улс, хотуудад өдөрт мянга мянган хүн тус аюулт цар тахлаас болж нас барж байгаа аймшигт мэдээлэл байна. Түүнчлэн дэлхийн олон улс орнууд болон хотууд энэ аймшигт цаг үеийг мөхөлгүй даван гарахын тулд, ард иргэд нь үхэж дуусалгүй тэсч үлдэхийн тулд тэмцэж байгаа тухайгаа мэдээлж байна.
Харин манай улсын хувьд, Улаанбаатар хотын тухайд аюулт цар тахлыг дотооддоо алдалгүй 10 сар гаруй болсон. Хэдийгээд одоогийн байдлаар дотооддоо алдсан байгаа ч халдвар авсан иргэдээ олж тогтоох, тусгаарлалтад авах, эмчилж эдгэрүүлэх, дарж устгах том зорилго, бүрэн итгэлтэйгээр Улс, Нийслэлийн Онцгой Комиссын бие бүрэлдэхүүн Монгол услад анх удаагаа бүх нийтийн бэлэн байдлыг зарлан ажиллаж байна. Ийм амаргүй цаг үед, анх удаагаа тохиож буй хүндрэлтэй олон асуудлуудыг өөрсдийн мэдлэг, ур чадвар, туршлага болон сэтгэл, зүтгэлээ дайчлан ажиллаж буй хотын дарга нарыг харьцуулах, хэн нэгнийг нь харлуулах, багт нь ажиллаж буй төрийн албан хаагчдыг гутаан доромжлох, төрийн ажлыг утгагүй болгож буй асуудлуудад сэтгэл эмзэглэж, бухимдал төрж байна. Ингээд та бүхэндээ Улаанбаатар хот болон Дархан хотыг харьцуулах боломжгүйг илтгэх дараах 5 үндэслэлийг өөрийнхөө харж, дүгнэж, ойлгож байгаагаар тайлбарлан хүргэе.
НЭГДҮГЭЭРТ: ХҮН, АМЫН ТОО: Нийслэл Улаанбаатар хотын хувьд 2019 оны статистик мэдээллээр 1.539.810 /нэг сая таван зуун гучин есөн мянга найман зуун арван/ хүн амьдарч байна. Харин та бүхний нэг түвшинд харьцуулаад байгаа Дархан хотод 85.524 /наян таван мянга таван зуун хорин дөрвөн/ хүн амьдардаг. Тус хүн амын тоог харьцуулаад үзэхэд тэнгэр, газар шиг ялгаатай байгаа юм. Мэдээж хүн амын тооноос хамаарч энэ цаг үед нийгмийн олон асуудлууд үүсч бий болж байгаа. Тодруулбал иргэдийг үзлэг, оношлогоонд хамруулах, эрүүл мэндийн байгууллагуудын хүртээмжийг нэмэгдүүлэх, тог цахилгаан, ус, дулаан хангамжийн байгууллагуудын хэвийн ажиллагааг хангах, хүнсний нийлүүлэлтийг хангах зэрэг олон асуудлууд Улаанбаатар хотын 1.539.810 иргэн болон Дархан хотын 85.524 иргэний хувьд тооны бөгөөд ачааллын хол зөрүүтэй байгаа.
ХОЁРДУГААРТ: ГАЗАР, НУТГИЙН ХЭМЖЭЭ: Улаанбаатар хотын хувьд 4.7 мянган км газар нутагт 9 дүүрэг, 174 хороотой. Тодруулбал хүн амын тоо болон дүүрэг, хороодын тооноос нь хамаарч Дархан хот шиг 18 хот нэг дор төвлөрч байна гэсэн үг. Үүнээс үзэхэд Улаанбаатар хотын удирдлагууд болон төрийн албан хаагчид маань 18 хотын асуудлыг шийдвэрлэхээр ажиллаж байгааг харуулж байна.
ГУРАВДУГААРТ: ТӨРИЙН БАЙГУУЛЛАГУУДЫН АЧААЛАЛ: Монгол улсын бүхий л асуудлыг шийдвэрлэдэг төрийн байгууллагууд бүгд Улаанбаатар хотод байрлаж байгаа нь нийслэлчүүд болон нийслэлийн нутгийн захиргааны байгууллагууд, харьяа байгууллагуудын ачааллыг нэмэгдүүлж байдаг. Тиймдээ ч энэ хүнд цаг үед шийдвэр, шийдэл гаргаж зохион байгуулалтад орж, улсын хэмжээний асуудлуудыг шийдвэрлэж ажиллах бүх дотоодын болон гадаадын төрийн байгууллагуудын ажилтан, албан хаагчид 10 хувьтай ажиллах шаардлагатай байгаа нь Улаанбаатар хот 0 зогсолт хийж болохгүйд хүргэж байгаа юм.
ДӨРӨВДҮГЭЭРТ: ҮЙЛЧИЛГЭЭНИЙ БАЙГУУЛЛАГУУДЫН АЧААЛАЛ: Монгол улсын нийт хүн амын тал нь амьдарч буй Улаанбаатар хотын иргэн бүрт хэрэгцээтэй байгаа бүх төрлийн үйлчилгээг хүргэхийн тулд өдөр тутамдаа төрийн болон хувийн хэвшлийн хэдэн зуун үйлчилгээний байгууллагууд тусгай горимд нийцүүлэн асар их ачааллыг аван ажиллаж байгаа. Амьдралын боломжтой иргэдэд гэрт нь ойрхон дэлгүүр, эмийн санд нь хүнсний бүтээгдэхүүн, эм тариаг нь цаг тухай бүрт нь хүргүүлж, хангалттай байлгах. Мөн амьдралын боломжгүй иргэдэд хүнсний талон болон хоол хүнсийг нь гэрт нь хүргэж өгөх гээд маш олон асуудлуудыг шийдвэрлэн ажиллаж байгаа. Тиймдээ ч өнөөдрийн байдлаар Улаанбаатар хотод өлбөрч болон хөлдөж үхсэн хүн бүртгэгдээгүй байгаа юм шүү.
ТАВ: ТӨРИЙН АЛБАН ХААГЧДЫН АЧААЛАЛ: Хүн амын тооноос хамаарч төрийн албан хаагчдын ажлын ачаалал хол зөрүүтэй байдаг. Бусад салбарыг мэдэхгүй ч манай салбарт гэхэд л дүүргийн соёлын асуудлыг 1 хүн л хариуцдаг. Ингээд бодохоор нийслэл Улаанбаатар хотод бүх салбарт ажиллаж буй төрийн албан хаагчид маань Дархан хотын төрийн албан хаагчдаас хэд дахин ачаалалтай ажиллаж байгаа нь дамжиггүй юм.
Гэтэл хүн л болсон хойн ажлын ачааллаас нь болж гүйцэтгэлийн хувь, үр дүнгийн чанар, хариуцлагатай байдал нь шууд хамаарч байдаг. Гэхдээ нийслэлийн нутгийн захиргааны байгууллагууд болон харьяа байгууллагуудын ажилтан, албан хаагчид бид ачаалалтай ажиллаад сурчихсан, хариуцлагатай байдагтаа өнөөдрийн энэ хүнд цаг үед өдий зэрэгтэй байж, цар тахлаас болж хотын иргэнийхээ алтан амийг алдаагүй цөөхөн хотуудын тоонд багтаж яваа юм.
Ингээд энэхүү бичвэрийнхээ төгсгөлд нийслэл Улаанбаатар хотын 1.539.810 иргэдийн сайн сайхны төлөө өдөр, шөнөгүй, өвдөх, амрах эрхгүй ажиллаж, хөдөлмөрлөж яваа мянга мянган төрийн албан хаагчид болон биднийг удирдан чиглүүлж яваа нийслэлийн удирдлагуудыг энэ хүнд цаг үед амар тайван ажлаа хийж, аюулт цар тахлаас ангижрах боломжийг олгож, элдэв муухайгаар харлуулалгүй, гутаан доромжлолгүй, худал гүтгэхгүй, төрийн ажилд төвөг учруулахгүй байхыг та бүхнээс хичээнгүйлэн хүсч, гуйж байна.
