“Астана-2026” чөлөөт бөхийн ДАШТ-д өрсөлдөж буй Т.Энхжин хоёр жил дараалан дэлхийн аваргын хүрэл медалийн төлөө барилдахаар боллоо. Харин Б.Хулан, Э.Даваанасан нар дагах барилдаанд ялбал хүрэл медалийн төлөө өрсөлдөх боломжтой.
Тэмцээний эмэгтэйчүүдийн -65 кг-ын жинд өрсөлдөж буй Т.Энхжин хагас шигшээд ялагдсанаар хүрэл медалийн төлөө барилдахаар боллоо. Тэрээр өнгөрсөн жилийн дэлхийн аваргаас хүрэл медаль хүртсэн бөгөөд энэ жил амжилтаа давтахын төлөө хүч сорих юм.
Эмэгтэйчүүдийн -57 кг-ын жинд ОУХМ Б.Хулан дагах барилдаанд энэ оны Европын аварга, Польшийн Магдалена Лизевскаг ялбал хүрэл медалийн төлөө барилдах эрхтэй болно. Түүнийг ялсан тохиолдолд Беларусийн Ирина Курочкина хүрэл медалийн төлөөх барилдаанд хүлээж байна. Тус жингийн алтан медалийн төлөө БНХАУ-ын Хун Кэсинь, Японы Сена Нагамото нар барилдахаар шалгарчээ.
Харин -76 кг-ын жинд ДАШТ-ий мөнгөн медальт Э.Даваанасан дагах барилдаанд Литвийн Камиле Гаукайтетэй хүч сорих юм. Ялсан нь хүрэл медалийн төлөө ДАШТ-ий гурван медальт, Киргизстаны Айпери Медет Кызитай барилдана. Энэ жингийн алтан медалийн төлөө Энэтхэгийн Кажал, Украины Анастасия Алпеева нар өрсөлдөхөөр болжээ.
Өнөөдөр барилдах бусад бөхчүүдийн сугалаа
Эмэгтэйчүүдийн -53 кг-ын жинд Азийн аварга шалгаруулах тэмцээн болон Азийн наадмын хүрэл медальт Б.Отгонтуяа Алжирын Чейма Чебилатай барилдана. Ялсан тохиолдолд шөвгийн 16-д Нигерийн Кристиана Огунсаняатай хүч үзэх юм.
-62 кг-ын жинд ДАШТ-ий хүрэл медальт Т.Алтжин Казахстаны Ирина Кузнецоватай барилдана. Тэрээр ялбал энэ онд нэг ч ялагдаагүй, дэлхийн хошой аварга Японы Нонока Озакитай учраа таарна.
-68 кг-ын жинд ДАШТ-ий мөнгөн медальт Э.Дэлгэрмаа Венесуэлийн Натали Херрератай хүч сорих бөгөөд ялсан нь Шведийн Тиндра Шёбергтэй барилдана.
-72 кг-ын жинд Азийн аварга З.Болортунгалаг Японы Махиро Ёшитакетэй учраа таарчээ. Японы бөх Азийн аварга шалгаруулах тэмцээний нэг алт, хоёр мөнгөн медальтай. З.Болортунгалаг дэлхийн чансааны зургаадугаар байрт эрэмбэлэгдэн тус тэмцээнд оролцож байна.
Чөлөөт бөхийн хоёр дахь өдрийн тэмцээн Улаанбаатарын цагаар 13:30-с эхэлнэ.
Discussion about this post