Улаанбаатар хот болон орон нутагт өвчлөл өдөр өдрөөр нэмэгдсээр дотоодын халдвар 400 шахаж эмч, ажилтнуудын ажил, амралтын дэглэм алдагдах, ядрах, туйлдах нь ихэсч бие махбодь, сэтгэл санааны хямралтай ажиллаж байна. Энэ цаг үед эмч, ажилтнуудынхаа дархлааг дэмжих, тэдэн урам зориг нэмэх, аюулт цар тахлыг ялан дийлэх эрч хүчийг нэмэхээр Монголын эрүүл мэндийн ажилтны үйлдвэрчний эвлэлийн холбооноос дараах тусламжийг үзүүллээ. 
Үүнд: Ажил үүргээ гүйцэтгэж байгаад COVID-19 халдвар авч эмчлүүлж байгаа эмч, сувилагч, лаборант, ажилтнуудад “Дархлаа дэмжих багц” олгов.
Үүнд: Халдварт өвчин судлалын үндэсний төвийн лабораторийн COVID-19 цар тахлын эрсдэлтэй нөхцөлд ажиллан PCR болон бусад төрлийн шинжилгээг 24 цагаар түргэн шуурхай хийж байгаа лабораторын эмч, лаборант, шил угаагч, туслах ажилтнуудад ажлын байранд нь 1 сарын хугацаанд халуун хоолоор үйлчлэх зорилгоор “хоол хүнсний бүтээгдэхүүн” олголоо; Үүнд: COVID-19 цар тахлын эсрэг тэргүүн фронтонд “Түргэвчилсэн болон PCR шинжилгээ авах ажлыг гардан хийж гүйцэтгэж буй” Зоонозын өвчин судлалын үндэсний төв, Баянзүрх, Хан-Уул, Сонгинохайрхан, Сүхбаатар, Чингэлтэй, Баянгол, Багануур, Налайх дүүргүүдийн эрүүл мэндийн төв болон нэгдсэн эмнэлэг болон зарим өрхийн ЭМТ-үүдийн нийт 1000 эмч, сувилагч, ажилтнуудад “Дархлаа сэргээх багц”-ыг тус тус сэтгэлийн тусламж болгон өргөлөө. (багцад: Салимон, Цэнэг, Санитол багтсан болно.) Зарим шаардлагатай цэгт “Эмнэлгийн зориулалттай нэг удаагийн амны хаалт” олголоо. Түүнчлэн цар тахал голомтлон гарч эмч, ажилтнууд олноороо тусгаарлагдан ажиллаж буй Сэлэнгэ аймгийн Нэгдсэн эмнэлэг болон мандал сумын ЭМТ болон өрхийн эмнэлгүүдэд дахин ариутгах зориулалттай “комбинзон, амны хаалт N95, эмнэлгийн бээлий болон дархлаажуулах багц”-уудыг илгээлээ.
Дээрх тусламж, үйл ажиллагаа нь нийт 18 эрүүл мэндийн байгууллагад 25сая төгрөгний өртөг бүхий хувийн хамгаалах хэрэгсэлд зориулж нийт 20000 ширхэг нэг удаагийн маск, 200 ширхэг шүүлтүүртэй N95 маск, нэг удаагийн бээлий 10 хайрцаг олгохын зэрэгцээ 1650 кг хүнсний болон 1040 багц дархлаажуулах бүтээгдэхүүн олгож байгаа ажээ. Тус холбоо Монгол Улсад цар тахал анх бүртгэгдэн ажиллах эхлэх үед III/26-нд ЭМЯ-нд 25.9 сая төгрөгний хамгаалан мөнгөн болон хамгаалах хэрэгслийн хандивыг өмнө өгч байсан бол энэ удаад шаардлагатай зүйлсийг нь олгох ажлыг ийнхүү хийжээ.
- Vitamin D3 5.000 IU 100 ширхэг -1 жилийн хэрэглээ (АНУ)
- Vitamin C 500 mg (Xon-Ce) 100 ширхэг -3 сарын хэрэглээ, (Индонез)
- Магни B6 100 ширхэг – 1 сарын хэрэглээ (Вьетнам)
- Чацарганы өтгөрүүлсэн шүү 2 литр (Үндэсний үйлдвэрлэл)
- Үхэр, хонь, тахианы мах 240кг
- Гурил 240кг
- Цагаа, шар будаа 36кг
- Ургамлын тос 18кг
- Төмс, байцаа, лууван, сонгино 388кг
- Давс 6кг
- Элсэн чихэр 24кг
- Сүү 30кг
- Чацарганы өтгөрүүлсэн шүүс 38 литр
- Үзэм 36кг
- Нийт 1650кг хүнсний бүтээгдэхүүн олголоо…
Цаашид хөдөлмөрийн хүнд нөхцөлд ажиллаж буй эмч, эмнэлгийн ажилтнуудын цалин урамшууллыг, тогтоомжинд зааснаас илүү нөхцлөөр олгох болон “Коронавируст халдвар(КОВИД-19)-ын цар тахлаас урьдчилан сэргийлэх, тэмцэх, нийгэм эдийн засагт үзүүлэх сөрөг нөлөөллийг бууруулах тухай” хуульд нэмэлт өөрчлөлт оруулж, эмч, эмнэлгийн ажилтнуудыг эрсдлийн даатгалд хамруулах асуудлыг яаралтай шийдвэрлэх, хамгаалах хэрэгслийн нөөцийг нэмэгдүүлэх шаардлагатай байна. 
COVID-19 цар тахал өвчнөөс иргэдийнхээ амь нас, эрүүл мэндийг хамгаалах үйлсэд зүтгэж буй Улсын болон нийслэлийн онцгой комисс, Эрүүл мэндийн яам, Цагдаа, Онцгой байдал, Мэргэжлийн хяналт болон бусад холбогдох байгууллага, албан хаагчиддаа Монголын эрүүл мэндийн ажилтны ҮЭ-ийн холбоо болон ҮЭ-ийн мянга мянган гишүүдийнхээ нэрийн өмнөөс чин сэтгэлийн талархал илэрхийлье
Монголын эрүүл мэндийн ажилтны ҮЭ-ийн холбоо 2020.11.30
