Эрүүл мэндийн дэд сайд асан Ж.Амарсанаа БНХАУ-ын Ухань хот явж коронавирусийг эмчилмээр байна, Гадаад хэргийн яам, Эрүүл мэндийн яам намайг явуулахгүй байна гэж гомдоллосон. Тэр ч бүү хэл Хятад явах эмч нарыг сайн дураараа бүртгэж хэвлэлийн бага хурал хүртэл хийсэн ч Хятадын талаас “Та бүхэнд баярлалаа” гэснээс өөр хариу өгөөгүй юм билээ. Энэ нөхөрт өдгөө боломж олдоод байна. Тэр өөрийн ид шидээ, нууц жороо вирусийн халдвар илэрсэн Сэлэнгэ, Дархан, Чойроос гадна ХӨСҮТ-д гаргах боломж бүрдлээ.
Би асуудалгүй коронавирусийг эмчилнэ гээд орилоод жагсаад байсан нөхөр шүү дээ. Гэтэл одоо шал өөр зүйл ярьчихсан явж байх юм. Ж.Амарсанаа “Би коронавирусийн вакцин оруулж ирэхээр хөөцөлдөж байна” гэсэн ярилцлага өгчээ. Үүнээс үүдэн өгүүлэхэд УИХ-ын гишүүн Ж.Батзандан, Лу.Болд нар Үндэсний аюулгүй байдлын зөвлөлд хандан мэдэгдэл гаргаж билээ.
Тэрхүү мэдэгдэлд Ж.Амарсанаа тэргүүтэй үл бүтэх этгээдүүд Хан-Уул дүүргийн 8000 хүүхдэд үл мэдэх вакцин тавьж эмийн туршилт хийсэн байна гэж билээ. Энэ тухай ч хэвлэлүүд бичсэн. Барууны өндөр хөгжилтэй орнууд ядуу буурай улсын хүн ам, хүүхэд багачуул дээр эм тарианы туршилт хийдэг. Нэг хүүхдэд 100 ам.доллараар хийдэг гэсэн тоо байдаг бөгөөд энэ ашгийн төлөө Ж.Амарсанаа Хан-Уул дүүргийн 8000 хүүхдийг золиослох дөхсөн.
Азаар тэр вакцин эмнээс хор хөнөөл илрээгүй байгаа билээ. Эцэг эхчүүд айдас түгшүүртэй байгаа гэдгээ хэлдэг. Энэ нөхрийг вакцин, эм тарианд ойртуулж болохгүй талаар АНУ-д амьдарч байгаа доктор Д.Наранбаатар “Ж.Амарсанаа маш хямдаар олдсон хорт хавдарын эсрэг 5 ам.долларын эмийг 900 ам.доллараар зарсан бузар этгээд” хэмээн буруутгаж явдаг юм. Ж.Амарсанаа хэвлэлд “Ерөнхийлөгчөөр дамжуулаад үр дүнтэй вакцин үйлдвэрлэсэн компаниуд руу шууд холбоо тогтоож ажиллавал монголын ард түмэн биднийг хүндэтгэнэ. Ингэж чадвал бид АН-даа улс төрийн оноо авна гэжээ.