Монголын төрд удаан ажиллаж, мэдээлэлтэй, давуу байдлаа ашиглан бүх салбарт сарвуугаа дүрэн хөлжсөн олигархуудын нэг бол яах аргагүй УИХ-ын гишүүн Сү.Батболд гэгдэж байна. Түүний мэдэлд өнөөдөр “Алтай холдинг” групп, “Скай хайпермаркет”, “Скайтел” компаниуд, Чингис хаан зочид буудал, “Дата кейр” компани, “Скай трейдинг” болон “Алтай Кашмир” ХХК, “Улаанбаатар синема” ХХК, Юнайтед бродкастинг корпорэйшн зэрэг найман охин компани байгаа бөгөөд жижиглэн худалдаа, харилцаа холбоо, зочид буудал, аялал жуулчлал, ноос ноолуурын салбарыг хэдийнээ гартаа оруулжээ.
Сү.Батболдын бизнесээ сүйхээтэй тэлэх бодлого АН, МАН-ын улстөрчдийг багтаасан МАНАН бүлгийн зарчмаар явагдаж өнөөдөр бизнесийн салбар дахь МАНАН бүлэг хэдийнэ түүний удирдлага, хэтэвч дотор багтаж буйг нотлох цөөн жишээг дурьдъя. Үүрэн холбооны салбарын 2 дахь том компани Скайтел групп өнөөдөр Сү.Батболдын мэдэлд бий. 2010 онд солонгосчууд Скайтелийн хувьцааг зарах гэж байхад тэрбээр хувьцааны 50 хувийг авсан бол үлдсэн 50 хувийг АН-ын гишүүн болох талийгаач Г.Батхүү агсны Шунхлай групп худалдан авч, АН, МАН-ын улстөрч, бизнесмэнүүд хэтэвчээ нэгтгэсэн түүхтэй.
Улс төр дагасан бизнесмэнүүдийг урхидсан жишээ ганц энэ биш. Иргэд Тавантолгойн орд ямархуу хэмжээний ашигтай вэ гэдгийг ойлгож амжаагүй байхад ордод эзэн сууж, МАН-ын Ц.Цэнгэл, АН-ын Батж.Батбаяр нарын хүмүүстэй ордыг хуваан эзэмшиж байв. Бүлэг Тавантолгойн ордыг төрийн мэдэлд эргүүлэн авах УИХ-ын шийдвэрийг он удаан жилээр гацааж байсан билээ. Монголын бүх тендэрийг голохгүй булааж, бизнесийнхэн дундаа нэр хүндээ барсан МCS компани ч Сү.Батболдын улс төр, бизнес дэх хамгийн том хамтрагч. МCS болон “Алтай холдинг” компаниуд Улаанбаатарчуудын амралт чөлөө цагаа өнгөрүүлж хэвшсэн “Скай ресорт” цанын баазыг эзэмшдэг юм.
“АСЕМ Вилла” хотхон, Скай ресорт цанын баазын бохир ус хальж Туул гол руу цутгаж байна. МХЕГ-ын улсын байцаагчдийн хөрснөөс авсан шинжилгээгээр бохир хальж, байгаль орчин бохирдуулаад зогсохгүй гэдэсний савханцрын үүсгэгч байгааг тогтоосон. Улсын дээд шүүхийн Хяналтын шатны Захиргааны хэргийн шүүх “Скай ресорт” цанын баазыг эзэмшдэг “Марриот” компани нь цанын баазыг ашигласан газрын төлбөрөө төлөөгүй явж ирснийг тогтоолоо гэх мэдээллүүд ч ердөө 2 жил хүрэхгүйн өмнө гарч байв.
“Скай ресорт” нь МCS группийн охин компани хэмээн мэдээлэгддэг болохоос “Алтай холдинг”-ийн нэр бараг дуулдаж байгаагүй. Энэ мэт үргэлжилсэн сэжмээрээ Монголын улс төр, бизнесийн бүлэглэл дэх бас нэгэн МАНАН бүлгийн ард сууж, судсыг нь атгаж, АН ялсан ч, МАН ялсан ч өөрт ашигтай шийдвэр гаргуулж ирсэн Сү.Батболдыг МАН улстөрийн тавцангаас буулгахгүй аваас 100 жилийн настай намынхаа нэр хүндэд цөв суулгаж мэдэхээр байна.
Эх сурвалж: Улс төрийн тойм