Увс аймагт АН, МАН хоёр орон нутгийн сонгуулиар ойролцоо гарсан бөгөөд таван бие даагчаас хамаарч засаглал тогтох болжээ. Таван бие даагчийн дөрөв нь УИХ-ын гишүүн Б.Чойжилсүрэнгийн талын хүмүүс юм.
Тэд нарыг МАН нэр дэвших эрх өгөөгүй юм билээ. Үүнээс үүдэн Б.Чойжилсүрэн, Ч.Хүрэлбаатар нарын хүмүүс гэсэн хуваагдал үүсч орон нутгийн сонгуульд аль нэг улс төрийн хүчин илэрхий ялалт байгуулж чадаагүй. МАН-ын хувьд хоёр хуваагдан орон нутгийн сонгуульд орж Б.Чойжилсүрэнгээ УИХ-ын гишүүнээс татах санаачилга гаргасан байдаг. Ямартай ч тэдний хуваагдал АН-д ашигтай туссан.
Нөгөө талаар “Тэсо” гэж нэрлэгддэг УИХ-ын гишүүн О.Цогтгэрэл орон нутагт нэлээдгүй мөнгө хаясан гэх сураг байгаа юм. Ямартай ч АН-ын уйгагүй ярилцлага, хэлэлцээрийн үр дүнд АН бие даагч дөрвөн нөхрийг өөрийн талд татан оруулж Засаг даргаа сонгохоор болжээ. Ерөнхийдөө хэн сайн наймаалцана тэр тал нь Засаг даргаа сонгодог байдал нэлэнхүйдээ ажиглагдаж байна.
Баянгол дүүрэгт МАХН-ын цорын ганц нэр дэвшигч Магнайбаяр үнэд хүрч хоёр тэрбумаар хар толгойгоо үнэлээд байгаа юм. ХҮН-ын хоёр ялагч хэлэлцээрт орох, орохгүйн дунд аальгүйтэж үнэ нь дөрвөн тэрбум төгрөгт хүрсэн гэх мэдээлэл бий. Ийнхүү ялангуутаа биеэ үнэлдэг, хавтгайрсан наймаа явах юм бол Орон нутгийн сонгууль хийх хэрэг байгаа юм уу.