Намбарын Энхбаярын Батшугар гэр хороолол гэх газрыг үзэв. Тэр АНУ-ын Бентлигийн их сургуульд сурч Лондон, Вашингтон, Токиогоор тэнэж амьдарсан. Тэр хүүд гэр хорооллын бүх зүйл содон сонин, магадгүй зоопаркт байгаа мэт сонин санагдана. Тэр ааваасаа “Гэр хорооллын хүмүүс яагаад хоол хүнсээ бага багаар авдаг юм бэ, гал түлдэг юм бэ, тэр муухай модон жорлонд орохгүй байж болдоггүй юм уу” гэж гайхан асууна.
Хөргөгч хоосон байх, гэрт мөс хөлдөх, хоосон ходоодтой олон хонохыг мэдэхгүй. Хөргөгчинд мөс хөлддөг гэдгийг л мэднэ. Яагаад гэвэл түүнд цаг ямагт үйлчлэгч байсан. Хөргөгчийг нь дүүргэдэг, тансаг хаусных нь халуун дулааныг тохируулдаг, хоол хийдэг олон хүн бий. Бүр хөшиг онгойлгож улавчийг нь авчирч өгнө. Түүнд мөнгө олох гэж өглөө гэрээсээ шаардлага байхгүй. Аавынх нь хөлсөө урсгаж, ээж нь тамираа тасартал ажил хийж хаанаас ч юм бэ олсон олон зуун тэрбум төгрөг бий. Зочид буудал, үл хөдлөх хөрөнгө, бизнесүүд, олон зуун ажилтнууд, тансаг машин байдаг.
Хайрт Сонгинохайрхан дүүрэгтээ Жи-500, Лексус-570 машинаа унаж очихгүй байна уу, эрээн оймс л гэхэд таны сарын цалингаас үнэтэй гээд бод. Тэр хүүхэд аав шигээ ухаантай, агуу удирдагч болоод арван саяын торгон дээл өмсөөд ард түмэнтэйгээ мэндлэхийг мөрөөддөг. Мөн аавыг нь шоронд хийсэн, нэр хүндийг нь унагасан этгээдүүдтэй тулалдахыг хүсч байгаа. Гэрт нь дайран орж өөрийг нь хавсарч унагаад аавыг нь өргөөд явсан тэр муусайн дайснуудыг үзэн ядна. Мөнгө яаж бий болдог, нуруугаа бөгтийтөл элс шороо зөөсөн мөнгөөрөө коктейль уухын оронд дэлгүүрээс хонины гэдэс зөөдгийг тэр огт ойлгохгүй.
Яагаад гэвэл тэр ийм амьдрал үзээгүй юм чинь. Батшугар үнэтэй машины унан давхиж, найз нараараа шоудаж, дэлгүүр сүйтгэн зугаацаж өөрөө ч мэдээгүй байхдаа Монгол банкны дэд Ерөнхийлөгч болж байв. Үзэсгэлэнт жүжигчид, мисс хүүхнүүдийг сольж унаад л. Яахав Монголд хийх ажил олдохгүй, уйтгартай л байхгүй юу. Батшугар жирийн хүнтэй ярьж чаддаггүй. Тэр барууны хэл, яриа боловсролтой учраас уйлах гэж байгаа мэт иргэдтэй сонин мэндлээд байгаа биз дээ. Яагаад гэвэл тэр хүүхэд харь гарагаас ирсэн. Ийм амьдрал мэдэхгүй. Анх удаа хямдхан машин унаад хямдхан хүмүүстэй уулзах амархан гэж бодож байна уу. Тэр аавынхаа үүрэг даалгавраар суралцаж байна. Хүмүүстэй яаж харилцах, өтгөн шингэн үнэртсэн гудамжаар алхахад суралцаж байна. Тун удахгүй аав шигээ өөрийнхөө бүтээсэн, байгуулсан хачин нийгмээс мөнгө босгож, олж сураад тэрбумтнаас цааш их наядтан болно.
Сонгинохайрханчууд нэг талаар их азтай ард түмэн юм. Энхбаярын Батшугар юу ч мэдэхгүй бацаан ирээд мөнгө цацаад л. Ямар бийлэгжүү юм бэ. Хажууд нь гэр хорооллоос төрсөн, одоо тэрбум төгрөг хуссан хэрэгт холбогдоод байгаа З.Баянсэлэнгэ зааж зөвлөөд л. МАХН ганцхан Батшугарыгаа гаргана. Бусад нь хэрэг ч үгүй. Харж байгаарай. Харин тэр гэр хороололд идээших болов уу, яах бол. Дараагийн сонгуулиар тойргоо солих болов уу. Одоо зугтаачих гээд байгаа хүүхдээс элдэв зүйл гуйж нурууг нь авчихав дээ. Аав ч яахав сонгуулийн дараа бүгдийг өгнө, бүтээнэ гэхээ мэднэ. Тэр хүүгээ дагуулан Африкт зугаалж яваа мэт гэр хороолол үзүүлж, улс төрд сургаж явна.
Орон нутгийн сонгууль шиг улс төрийн бэлтгэл курс, дамжаа гэж үгүй. “Усанд амьдрах гэж байгаа матартай бүү тэрсэлд” гэдэг шиг Монголоос мөнгө олох гэж л байгаа бол гэр хорооллоос нь тэрбумтан болно. Гэр хорооллынхон асар их баялаг, эрх мэдэлд хүргэдэг гал тэрэгний эзэд гэдгээ хэзээ ч мэддэггүй. (Э.Бат-Үүл хүүгээ гэр хорооллоос тэрбумтан болгосон) Эндээс Оюутолгойг худалдах, Тавантолгойг тасдах мэргэн санаа олсон их удирдагч, Авлигын загалмайлсан эцгүүд галт тэргэнд суух тасалбараа анхлан авдаг юм бацаанууд аа.