Шинжлэх ухааны академийн Ерөнхийлөгч Д.Рэгдэл, Зава Дамдины хойд дүр Д.Осгонбаяр хоёрын энэ зураг “Улааны шашин шинжлэх ухааныг ялсан нь” гэсэн тайлбартайгаар хүрч байгаа юм. Хүн төрөлхтөн шашин, шинжлэх ухаан хоёрт хүндэтгэлтэй хандаж ирсэн.
Аль нь давамгай үед нэгнээ үгүйсгэдэг, шатаасан асуудал байсан л байх. Гэхдээ хүндэтгэлтэй хандаж ирсэн байдаг юм. Ю.Гагаринг сансарт нисээд ирэхэд ЗХУ-ын удирдагч Н.С. Хрушев “Дээр бурхан байна уу” гэхэд цаадах нь “Байна лээ” гэжээ. Н.С.Хрушев “Би ч бас тэгж боддог юм хүнд битгий хэлээрэй” гэдэг. Ромын пап ламтан асуухад “Дээр бурхан байхгүй байна лээ” гэхэд цаадах нь “Тийм байх аа.
Би бас тэгж боддог юм. Хүнд битгий хэлээрэй” гэсэн гэдэг. Энд юу хэлээд байна гэхээр шашин ч шинжлэх ухаан ч бие биенээ үгүйсгэх, дарах гэж оролдож байсангүй хүйтэн дайны үед оршиж байжээ. Тэгэхээр дээрхи зургийг үзээд л шашин шинжлэх ухаан нам цохив, ялагдав гэх мэтээр бичээд байх шаардлагагүй юм. Хүн төрөлхтөн өнөөг хүртэл шашинаа үгүйсгэж чадсангүй.
Шашин ч шинжлэх ухаанаа үгүйсгэж бүтээгчээ нотлож чадсангүй. Шинжлэх ухааны академийн Ерөнхийлөгч Д.Рэгдэл монгол хүнийн адилаар шашин шүтдэг бөгөөд улааны шашинтай, Шүгдэн сахиустай Осгонбаяр ламын шавь ажгуу. Тэрээр шинжлэх ухааны ачаар бус Шүгдэн сахиусны хүчээр өдий зэрэгтэй яваа гэдэг нэгэн билээ. Одоо яалтай билээ. Шинжлэх ухаанч бус төр засагтай, хашаа барьсан ч ламаар сан тавиулж өөрстөө итгэдэггүй хүмүүс билээ.
Дэлхий дээр шашин, шинжлэх ухаан хоёр нэг хөнжилд ордоггүй ч манайх шиг нэг нэгнээ илэрхий шүтээд байдаггүй. Гэтэл өнөө цагт шинжлэх ухааны академи нь шашинаа шүтээд байгаа нь залуус таалагдахгүй байгаа бололтой. Нийлээд бус тус тусдаа явахыг Үндсэн хуулиар заасан ч бие биедээ хайртай хосууд тэмүүлээд байх юм даа.
