УИХ-ын сонгуулиар “Хүн-Аалз”, “Муур эмэгтэй”-н хувцас өмссөн нэр дэвшигчид хөгшчүүлийг айлган хүүхдүүдийг гайхшруулан гудамжаар гүйсэн билээ. Тэдгээр нэр дэвшигчид “Хүн-Аалз” шиг хурдан шуурхай, иргэдийн дээгүүр нисэн гай зовлонгоос аварна гэдэг утгыг илэрхийсэн. “Муур эмэгтэй”-г нэр дэвшигч шүтдэг бөгөөд шударгa бусын төлөө амь хайргүй тэмцэнэ гэдгээ илэрхийлсэн илэрхийлэл юм.
Өөрсдийн хийсэн ажил, нүүр царайгаар олон нийтэд танигдаагүй нэр дэвшигчид иймэрхүү арга хэрэглэдэг ч үр дүнд хүрдэггүй. Мөн Чингис, Өэлүн эх, Жамуха, Сүхбаатар хэмээн нэр солин улс төрд үзсэн тохиолдлууд цөөнгүй. Ихэнх нь амжилт гаргаагүй юм билээ. Өдгөө орон нутгийн сонгуульд Поророгийн хувцастай, түүний дэмжлэгтэй улс төрчид нэр дэвшээд байх юм.
Яг үнэндээ Поророг хүүхдүүд үздэг бөгөөд сонгуульд санал өгөхгүй гэдгийг “Мандухай Цэцэн хатан” дээр Иш төмөр хэлдэг шиг “Мэддэггүй л малууд байх даа”. Бас нэг нөхөр Чингис хааны баатар шиг зургаа авахуулаад тэнэгдүү хэмээн шоолуудаад явж байх жишээтэй. Харагдах байдлаараа, хүүхэлдэйн киноны баатраар мань мэтийгээ хуурах гээд нэмэргүй л дээ. Тэр хүүхэлдэйн киноны баатар амьдрал дээр байдаггүй, зохиол гэдгийг таван настай даа ойлгоод амьдралд ойроор нь “Загалмайлсан эцэг” киногоо Женко ахтай үзээд эхэлчихсэн юм шүү дээ.
