Өнгөрсeн даваа гарагт Hийслэлийн төсвийн хөрөнгөөр цагдаа, эрүүл мэндийн байгууллагад туулах чадвар сайтай автомашинууд гардуулсан.
Эдгээр автомашиныг худалдан авахын тулд Нийслэл нээлттэй тендер шалгаруулалт зарлаж олон нийтэд ил тод мэдээлэх ёстой. Гэтэл хотын дарга асан С.Амарсайхан тендерт оролцохоор бичиг баримтаа бэлдэж байсан компаниудыг хохироож, Монголын нөлөө бүхий ганц компанид боломж олгожээ.
Тодруулбал, С.Амарсайхан хотын даргаар ажиллаж байхдаа Нийслэлийн төсвийн Ерөнхийлөн захирагчийн 2020 худалдан авах ажиллагааны төлөвлөгөөг тавдугаар сарын 25-нд гаргахдаа дээрх автомашины худалдан авалтыг нээлттэй тендер шалгаруулна хэмээн тусгажээ.
Гэтэл тэрбээр гаргасан төлөвлөгөөгөө зөрчиж тендер зарлалгүйгээр “Моннис” группт 7.550.000.000 /долоон тэрбум таван зуун тавин сая/ төгрөгийн үнэ бүхий дээрх автомашин нийлүүлэх тендерийг ногоон гэрлээр өгчээ. Энэхүү мөнгөн дүн зөвхөн цагдаагийн байгууллагад өгсөн 110 автомашины мөнгөн дүн. Үүнд эрүүл мэндийн салбарт өгсөн 40 автоамшины 4.8 тэрбум төгрөгийг оролцуулбал нийтдээ 12 тэрбум 355 сая төгрөг болно гэсэн үг. Ийм л өндөр үнэ бүхий тендерийг хотын дарга асан С.Амарсайхан ямар ч сонгон шалгаруулалтгүйгээр “Моннис” группт өгсөн нь ямар ашиг сонирхол байв. Үүний ард ямар тохироо хийгдэв гэсэн асуултын тэмдэг анхаарал татахаас гарцаагүй.
Хэрвээ тендер зарлахгүйгээр автомашин нийлүүлэлт хийх байсан юм бол С.Амарсайхан дарга яагаад 2020 оны худалдан авах ажиллагааны төлөвлөгөө гаргах болов гэсэн асуулт ч эрхгүй гарч ирж байна.
Яг үнэндээ Монголын толгой баячуудын эхний 25 дотор бичигддэг “Моннис”-ийн эзэн Б.Чулуунбаатар Монголын автомашины зах зээлд хэдийнээ ноёрхсон нэгэн. Тэрбээр яаж яваад С.Амарсайханы толгойг гажтал барьж 12 тэрбум 355 сая төгрөгийн тендерийг ямар ч өрсөлдөгчгүйгээр авах болов гэдгийг хууль хяналтынхан шалгаад үзэхэд гэмгүй болов уу.
Ингэж хэлэхийн учир нь 2007 онд Засгийн Газрын Хэрэг Эрхлэх Газар, МҮОНРТ, Хотын захиргаа, Төрийн тусгай үйлчилгээний газрын автомашиныг шинэчлэх нээлттэй тендер зарлагдсан байдаг. Харин тендерийг “Моннис” групп бас л ногоон гэрлээр авч, улмаар Засгийн газарт “Toyata”, “Nissan Teana”, “Nissan Maxima”, “Nissan Patrol” зэрэг 20 автомашин шахсан түүх бий.
Мөн Б.Чулуунбаатар 2013 онд “Эрдэнэс Тавантолгой” төрийн өмчит компанид БНХАУ-аас оруулж ирсэн чанаргүй авто машинууд шахсаны улмаас Эрүүгийн хуулийн 233.2-т зааснаар хуурамч бичиг баримт ашиглан аж ахуйн нэгж, байгууллагад онц их хэмжээний хохирол учруулсан гэсэн зүйл ангиар эрүүгийн хэрэгт татагдаж байсан ч энэ хэргээс мултарч чадсан. Түүний нийлүүлсэн автомашинууд зургаан сар ч хүрэхгүй хугацаанд шатахуун их “иддэг”, засвар авдаггүй зэрэг шалтгаанаар актлагдсан тухай мэдээлэл өдгөө хэвлэлийн хуудаснаа баримт болон үлдчихсэн байна. Тиймээс л төсвийн мөнгө, татварын мөнгө, иргэдийн мөнгөөр хотын удирдлагууд ингэж хууль бусаар аашлах нь хэр зохистой вэ.
Ямартай ч улстөрийн дэмжлэгтэйгээр тендер авч бизнесээ өргөжүүлсэн Б.Чулуунбаатарын энэхүү үйлдлийг хуулийнхан дахин анхааралдаа авч, өндөр мөнгөн дүнтэй тендерийн ард ямар ашиг сонирхол байв гэдгийг шалгавал зохистой болов уу. Бид дараагийн удаа “Моннис” группын сурагчдын автобусыг өрсөлдөгчгүйгээр хэрхэн оруулж ирэх гэж буй тухай мэдээллийг хүргэнэ.
Эх сурвалж: Erennews.mn