Ерөнхий Прокурорын газраас Чингэлтэй дүүргийн есдүгээр хорооны нутагт хүүхдийн тоглоомын талбайг байгуулан хорооны Засаг даргад хүлээлгэн өгчээ. Тус талбайг Үндэсний цэцэрлэгт хүрээлэнгийн дэргэдэх тогтоол усанд живсэн дөрвөн хүүгийн дурсгалд зориулан бүтээсэн байна. Тоглоомын талбайг байгуулахад 24 сая төгрөгийн хөрөнгө хэрэгтэй байсан ба МУ-ын Ерөнхий Прокурорын газрын ажилтнууд хандив цуглуулан хөрөнгө босгожээ.
Энэ талаар Чингэлтэй дүүргийн Засаг дарга Н.Батсүмбэрэл сэтгэгдлээ хуваалцсан байна. Тэрээр “Прокурорын байгууллагын прокурор, ажилтнууд цалингаа хуримтлуулж дүүргийн нутаг дэвсгэрт тоглоомын талбай байгуулж өгсөнд баярлаж байна. Өнгөрсөн зун та бүхэн санаж байгаа байх. Манай дүүргийн дөрвөн хүүхэд усанд эндсэн харамсалтай үйл явдал болсон.
Хүүхдүүдийн нэг нь есдүгээр хороонд амьдардаг байсан. Энэ үйл явдал нь хүүхдүүдийн тоглох, чөлөөт цагаа өнгөрөөх нөхцөл байдалд анхаарах цаг болсоныг сануулж, төрийн болон төрийн бус байгууллагууд анхаарал хандуулж эхэлсэн. Тэр дундаа төрийн тусгай албан хаагчид санаачлага гаргаж Дэнжийн мянгын гэр хороололд хүүхдийн тоглоомын талбай байгуулж өгсөн явдалд үнэхээр баяртай байна. Нийт прокуроруудад чин сэтгэлийн талархал илэрхийлж 90 жилийн ойн баярын мэнд хүргэе” гэжээ.
УЕПГ-ын Бичиг хэргийн эрхлэгч Э.Батпүрэв: Улсын Ерөнхий прокурорын газрын залуу ажилтнууд нэгдэн энэхүү санаачлагыг 2020 оны долдугаар сард гаргасан. Гэр хороололд тоглоомын талбай байхгүйн улмаас хүүхдүүдийн амь нас нь эрсэдсэн тохиолдолд ч гарсан.
Прокурорын байгууллагын түүхт 90 жилийн ойн босгон дээр тоглоомын талбай байгуулсандаа баяртай байна. Энэ дашрамд сайн үйлсийн арга хэмжээнд нэгдсэн нийт прокурор, ажилтнууддаа баярласнаа илэрхийлье.
Хоосон талбайг хоёр сарын хугацаанд тохижуулж, хүүхдүүдэд аюулгүй орчинг бүрдүүлж, гэр хороололд тоглоомын талбайг байгуулж өгсөнд тус хорооны хүүхэд багачууд болон эцэг эхчүүд прокурорын байгууллагын нийт прокурор, ажилтан албан хаагчдад талархал илэрхийлжээ.
