Эрчим хүчний сайд Н.Тавинбэхтэй УИХ-ын гишүүн Ч.Ундрам уулзлаа. Тус уулзалтаар УИХ-ын гишүүн Ч.Ундрам Сэлэнгэ аймагт нэн яаралтай шийдвэрлэвэл зохих хэд хэдэн асуудалд салбарын сайдыг анхаарлаа онцгой хандуулж ажиллахыг хүслээ. Тухайлбал “Сэлэнгэ энерго” ОНӨААТҮГ дулаан үйлдвэрлэл явуулахад зарцуулалт хүрэлцэхгүй, улмаар доголдол үүсэж энэ өвөл хөлдөх эрсдэл бодитоор бий болсон тул тус байгууллагад дулааны алдагдлын санхүүжилт болгож төрөөс олгодог татаасыг хэмжээг нэмэгдүүлж, улсын төсөвт тусгуулах, зарим тоног төхөөрөмжийг шинэчлэх шаардлагатай болсныг илэрхийлэв. “Сэлэнгэ энерго” ОНӨААТҮГ-т дулааны алдагдлын санхүүжилтэд төсвөөс 500 сая төгрөгийн татаасыг олгож ирсэн ч үйл ажиллагаанд хүрэлцдэггүй, өдөр ирэх тусам нөхцөл байдал хүндэрчээ. Тиймээс татаасын хэмжээг 1.4 тэрбум төгрөгт хүргэж, Улсын нэгдсэн төсөвт 900 сая төгрөгийг нэмж суулгуулах шаардлага байгаа аж.
Мөн тус байгууллагад техникийн шинэчлэл хийгдээгүйгээс өдгөө үйл ажиллагаа доголдох нэг хүчин зүйл болж байна. Тодруулбал, 20 мвт-аас дээш хүчин чадалтай зуух хоёр ширхэг, 1400-1600 м3/цаг зарцуулалттай, 100 м түрэлттэй ком насос нэг ширхэг, технологийн хэрэгцээний өөрөө буулгагч авто самосвал хоёр ширхэг, авто ачигч нэг ширхэг, бага оврын экскаватор нэг ширхэг тус тус шаардлагатай болсон. Тиймээс эдгээр техникийг худалдан авах хөрөнгийн эх үүсвэрийг төсөвт суулгуулах хэрэгцээ зүй ёсоор бий болжээ. Уг мэдээлэлтэй Эрчим хүчний сайд Н.Тавинбэх танилцаад яам, Эрчим хүчний зохицуулах хорооны хамтарсан ажлын хэсэг томилж дараа долоо хоногт Сэлэнгэ аймагт ажиллуулахаар болов. Ажлын хэсэг “Сэлэнгэ энерго” ОНӨААТҮГ-ын үйл ажиллагаа, үүссэн хүндрэлтэй газар дээр нь танилцаж, холбогдох дүгнэлтийг гаргасны дараа хэрхэн шийдвэрлэх талаар албан ёсоор хариу өгөхөө салбарын сайд илэрхийлэв.
“Сэлэнгэ энерго” ОНӨААТҮГ нь Сэлэнгэ аймгийн Сүхбаатар, Алтанбулаг, Цагааннуур, Ерөө сумын Бугант тосгоны нийт 2944 айл өрх, 62 төсөвт газар, 329 ААН-ыг дулаанаар ханган ажилладаг байна. Хэдийгээр дэлхийн нийтийг хамарсан цар тахалтай холбоотойгоор эдийн засаг хумигдаж Монгол Улс Улсын нэгдсэн төсвийг тодотгох, зардлыг танах бодлого барьж байгаа ч сэлэнгэчүүдийн амь, амьдралтай холбоотой уг асуудалд шуурхай арга хэмжээ авах ёстой гэдэгт санал нэгдэв.
Мөн энэ үеэр УИХ-ын гишүүн Ч.Ундрам цахилгааны үнэ тариф болон хэрэглээгээ хянах боломжгүй байдаг тухай сэлэнгэчүүдийн санал, гомдлыг уламжлаад үүнийг нэг мөр болгож, шаардлагатай бол хяналт, шалгалтыг холбогдох газарт хийхийг Н.Тавинбэх сайдаас хүслээ. Иргэд цахилгааны үнийн тариф харилцан адилгүй мөрдөгддөг, өөрийн эрчим хүчний хэрэглээгээ хянах, тоолуурын заалтыг харж чаддаггүй зэрэг гомдлыг олноор ирүүлжээ. Тиймээс хүсэлтийн дагуу иргэдийн санал, гомдлын мөрөөр ажлын хэсэг ажиллуулж, үр дүнг бичгээр танилцуулахаар тогтов.
Тэд цаашид сэргээгдэх эрчим хүчийг ашиглаж, эрчим хүчний зарим хэрэгцээг хангах боломжийн талаар санал солилцов. Энэ хүрээнд Монгол Улсад тэр дундаа Сэлэнгэ аймагт Сэлэнгэ мөрнийг түшиглэн усан цахилгаан станцыг байгуулах нь хамгийн тохиромжтой талаар дурдлаа. Хэрэв уг ажлыг хэрэгжүүлж чадвал өвөл зун, өдөр шөнийг харгалзахгүйгээр байнгын цахилгаан үйлдвэрлэх, одоогийн цахилгааны нэгж хэрэглэгчдэд хүрч буй үнийг бууруулах боломжтой болох юм. Мөн Швейд улсын жишгээр сэргээгдэх эрчим хүчийг ашиглан олон нийтийн зам талбайд иргэдэд хэрэгцээтэй үйлчилгээг цахилгаанжуулах, өдөр тутмын амьдралдаа тогтмол ашиглах боломжтойг онцлов. Уулзалтын төгсгөлд УИХ-ын гишүүн Ч.Ундрам Эрчим хүчний сайд Н.Тавинбэхэд Дархан-Сэлэнгэ чиглэлийн авто замаас Шаамар-Зүүнбүрэн-Цагааннуур-Түшиг-Зэлтэрийн боомт чиглэлийн 120.85 км хатуу хучилттай авто замын барилгын төслийг хэрэгжүүлэхэд Засгийн газрын гишүүний хувиар дэмжиж ажиллахыг хүсэж, ажлын амжилт хүсэв.
Дашрамд дурдахад Засгийн газрын 2017 оны 199-р тогтоолоор баталсан гэр хорооллын хэрэглэгчдийн орой болон шөнийн цагт хэрэглэсэн цахилгааны тарифт хөнгөлөлт үзүүлэх журмын дагуу Эрчим хүчний зохицуулах хорооноос гаргасан шийдвэрээр Улаанбаатар хотын гэр хорооллын хоёр тарифт тоолууртай айл өрхийн цахилгааны тарифийг 100 хувь, бусад аймгийн төв, 10 мянгаас дээш хүн амтай төв сум, суурин газрын хэрэглэгчдийн цахилгааныг 50 хувь хөнгөлж байсныг үргэлжлүүлэн мөрдөхөөр болжээ. Ингэснээр 111 мянган өрх цахилгааныг хөнгөлөлттэй үнээр хэрэглэх боломж хэвээр үлдэж байна. Иргэд шөнийн тарифын хөнгөлөлтийг эдлэхийн тулд өмнөх өр төлбөргүй байх, хоёр тарифт тоолуурыг ашигладаг байх шаардлагатай юм.
