Коронавирус хүмүүсийг гэрээс нь хөөж байна
Их Британийн өдөр тутмын “Тheguardian” сонинд иргэндээ хилээ нээгээгүй Монгол Улсын талаарх нийтлэл хэвлэгджээ. Түүнээс сийрүүлбэл, Энэ хавар Будапешт суралцаж байгаад сургуулиа төгссөн Пүжээ ажил үүрэг, гэр бүл нь түүнийг хүлээж байгаа Улаанбаатар дахь гэр лүүгээ буцах болсон байжээ. Гэхдээ гуравдугаар сарын дундуур Монгол Улс нь хилээ бүрэн хааж, тэр байтугай өөрийн орны иргэддээ ч үүд хаалгаа нээж өгөхгүй байгаа юм. Өдгөө 26 настай Пүжээ бол Европт гацсан олон мянган монголчуудын нэг.
Коронавирус нь дэлхийн сая сая хүний аяллын төлөвлөгөөг нурааж, амралт, зугаалгыг нь сүйтгэж, холын зайны үерхэлийг шалгаж буй нь өнөөдрийн бодит үнэн юм. Гэхдээ эх орон руугаа буцах боломжгүй хэвээр байгаа олон хүний асуудалтай харьцуулахад эдгээр нь тийм ч сүртэй хэрэг огтоос биш. Монголчуудын хувьд тэд хамгийн хүнд цохилтод ороод байгаа улс. Тэдний гэртээ харих ганц боломжит арга зам бол сардаа ганц удаа үйлдэж буй Франкфурт болон Истанбулын чартер нислэг юм. Онгоцны тийз нь тэнгэрт тулсан үнэтэйн дээр 21 хоногийн Засгийн газрын тусгаарлалтын төлбөрийг ирэхээсээ өмнө заавал төлсөн байх шаардлагатай.
Энэ бол мөнгөтэй хүмүүсийн хувьд ч гэсэн биелүүлэхэд хэрээс хэтэрсэн хүнд шаардлага юм. Олон мянган хүн харих онгоцонд суудал авахаар өргөдлөө өгсөөр байгаа ч Засгийн газраас нь тайлбарлаж байгаачлан ядарсан хүнээ эхлээд татахын тулд эдгээр өргөдлүүдээс татгалзаж, буцааж байгаа юм. Монголын Гадаад харилцааны яам нь ч энэ асуудал дээр ямар нэгэн хариу өгч, арга хэмжээ авалгүй зүгээр л суусаар байдаг. “Европ дахь 2500 орчим монголчууд сард хоёрхон удаа гарах энэхүү чартер нислэгийг нь хэр удаан хүлээж байгааг та нар төсөөлөөд үздээ” хэмээн Европт гацсан монголчууд фэйсбүүк группыг үүсгэн байгуулсан Л.Оюунаа өөрийн бухимдлаа бидэнтэй хуваалцсан юм. Мөн “эдгээрийн ихэнх нь мөнгөгүй болсон оюутнууд эсвэл 3-р сард буцах нислэг нь цуцлагдсанаас болж хэдэн сараар хүлээж буй богино хугацааны аяллын визатай жуулчин иргэд байгаа” хэмээсэн юм.
Иймд чартер нислэгт багтаж чадахгүй байгаа зарим монголчууд нь илүү бүтээлч хувилбаруудыг туршиж үзэж байна. Унгар улс дахь хэсэг бүлэг иргэн нислэг гаргуулахаар Засгийн газартаа санал тавьсан боловч эрх баригчид тэнд газардахаас зайлсхийв. Иймээс тэд өөрсдөө Оросын нутаг дэвсгэрээр хэдэн арван өдөр нойртой, нойргүй, хоолтой, хоолгүй яван байж очвол Монгол Улсынхаа хилээр орж чадна гэсэн чин итгэлтэй байжээ.
Гэтэл ингэж зовон байж эх орноо бараадсан Пүжээ гэх монгол эмэгтэйг улс нь хүлээж авсангүй. Тэрбээр Будапешт хотод зөөгчийн цагийн ажил хийж амьдралаа залгуулдаг байсан ч ажил нь зогсчээ. Түүнчлэн Ази төрхнөөс нь болж коронавирус тархаасан хэмээн метронд явж байхад нь гадаад хүмүүс дайрч, шүхрээр цохиулаад ч амжсан нэгэн. Тэрбээр, “Миний их сургуулийн тэтгэлэг дууссан, энд ажил олоход хэцүү, визаны хугацаа дуусч, надад амьдрах газар үгүй болсон тул би зүгээр л гэртээ харьмаар байна” гэж хэлсэн юм.
Эх сурвалж: Erennews.mn