Өнөөгийн нөхцөл бaйдaл өөрчлөгдөхгүй хэвээр хaдгaлaгдaн үлдвэл Монгол Улс бaйнгын хямрaлтaй орон бaйсaaр бaйх, МAН бa AН хэмээх хоёр нaм нэг бол ээлжилж, эсхүл хaмтрaн төр зaсгийн эрхийг цaaшид ч үргэлжлүүлэн бaрьсaaр бaйх, тэдний удирдлагатай далдын хүйн холбоотой нь олон дахин батлагдсан гадаад, дотоодын олигархууд байгалийн баялгийг өмчилсөөр байх, тэдний мөнгөний болон санхүүгийн харалган бодлого баячуулыг улам баяжуулсаар ядуучуудыг улам ядууруулсаар байх, ажилгүйдэл өндөр, цалин орлого доогуур байсаар байх эмгэнэлтэй байдал цаашид ч үргэлжлэх нь тодорхой.
МАН ба АН-ын “чөтгөрийн тойрог”-ийн гинжийг тас цохиж хүлээснээс нь мултран гарахгүй бол Монголчууд, ялангуяа залуучууд маань мэдлэг боловсролтой болох, нарийн мэргэжил эзэмших, авьяас чадвараа нээн хөгжүүлэх, хөрш орнуудын үеийн залуучуудтай эн тэнцүү өрсөлдөх чадваргүй, хүн болсны хэргээ гарган аав ээж, ах эгч, гэр бүлээ баярлуулах ямар ч боломжгүй байсаар байх болно.
Тэдний дараагийн үе болох хүүхдүүдийн маань байдал улам хүндрэх, олонхи нь сургуульгүй, мэдлэггүй, ажилгүй, орлогогүй байх, охидууд биеэ үнэлэх, хөвгүүд хэрэг төвөгт орж шоронгийн хаалга татах, өрх гэр салж сарних, “азтайнууд” гэх нь, үнэн хэрэгтээ эх орондоо “хэрэггүй” болсон” хойч үе маань тэр аяараа ямар нэгэн аргаар гадагшаа дүрвэн гарахыг мөрөөдөх зэргээр өдөр хоногийг өнгөрөөх болно.
Тэр хойгуур эзгүйрсэн Монголд маань гадаад, дотоодын олигархиуд МАН ба АН-ыг ашиглан эзэн сууж, Монголчууд Та бидний мэдэлд байх ёстой баялгийг өмчилж, сонгуулийн үеэр шавхрууг нь долоолгон хууран мэхэлж, Та бидний өвөг дээдсийн амь насаа хайрлалгүй тэмцэн бүтээж Та бидэнд уламжлуулан өгсөн БАХАРХАЛЫН ТҮҮХ-ийг Та бидний өөрсдийн идэвхгүй залхуу, арчаагүй дорой, аймхай хулчгар, хариуцлагагүй хайнга байдлаас үүдсэн удаа дараагийн буруу сонголтоор Гутамшигийн түүх” болгоно.
Тэд та бидний өөрсдийн шууд оролцоотойгоор Та биднийг элэг барьж байна гэдгийг ойлгож ухаарах цаг ирлээ. Өвөг дээдэс маань энэ сайхан түүхийг Та бидэнд өвлүүлэн өгөхдөө “баяжуулаарай” гэж захиагүй гэж үү?
Ингэж эх орондоо харийн нутагт амь зогоож байгаа юм шиг болчихоод Та бид хүүхдүүдийнхээ нүд рүү яаж эгц харах вэ? Тэднийхээ “Яагаад ийм муухай болсон юм бэ?”, “Та ийм муухай болгохгүйн төлөө өөрөө юу хийсэн юм бэ?” гэсэн асуултад юу гэж хариулах вэ? Өвөг дээдсийнхээ санаа сэтгэлийг яаж тайвшруулах вэ? Үр хүүхэд-маань хэзээ эх орондоо эзэн нь болно гэж бодох вэ? Эх орны хувь заяаны харанга дэлдэж байна. Сонсогтун!
ТА БИД ЗӨВ СОНГОЛТ ХИЙЖ ӨӨРСДИЙГӨӨ АВРАХГҮЙ БОЛ ӨӨР ХЭН Ч АВРАХГҮЙ ГЭДГИЙГ ОЙЛГОХ ЦАГ ИРЛЭЭ! УХААРАГТУН!
Өөрсдийгөө, өлгий сайхан газар нутгаа МАН ба АН-ын шуналтнуудын савраас салган буцааж авах шаардлага тулж ирлээ! Зориглогтун! Та бид эр зоригоо үзүүлж хувьсгал хийх хэрэгтэй! Сонгуулийн хувьсгал! Энэ бол Та бидний, Та бидний үр хүүхдийн амьдрал өөдлөх эсэхийг шийдэх сүүлчийн боломж! Бүү алдагтун! 2020 он – Сонгуулийн хувьсгалын он!
Хоёр дахин 20 гэсэн тоо. 20-20. Хорь гэсэн тоог илэрхийлсэн үг “хорих” гэсэн үгийн тушаах хэлбэр. Тийм ээ, МАН-ыг ч хорь, АН-ыг ч хорь! Тодруулвал аль алиныг нь боль гэсэн үг. МАН-ыг ч боль, АН-ыг ч боль!
Тийм ээ, “Та бидний Эвсэл” Та бидэнтэй хамтран хувьсгал хийхийг уриалж байна! Сонгуулийн хувьсгал, Та бидний хувьсгал! Та бидний хувьсгалын ялалт Та бидэнд, Та бидний үр хүүхдэд эх орон, эх орны баялагт бүгдээрээ эзэн суух боломж олгоно! Ахин дахин олдохгүй алтан боломж! МАХН тэргүүтэй “Та бидний Эвсэл”-ийн Мөрийн хөтөлбөр Монгол хүн-Монголын суурь баялаг, Монгол гэр бүл-Монголын тулгуур баялаг, Монгол төр засаг-Монголын түшиг баялаг гэсэн 3 суурьтай. Ийм 3 баялаг дээр тогтсон Монгол Улс бат бэх оршино.
Энэ сонгуулиар МАХН, ИЗНН, МУНН хамтарсан “Та бидний эвсэл” сонгогч та бүхэнтэйгээ хамтран зоригтой өөрчлөх болно. Таны, Та бидний, Монголын ирээдүйн хувь заяа Та Бидний сонголтоо хийх үзэгний үзүүрт бий. Сонгуульдаа бүгдээрээ ирцгээе!, Ходоодоороо биш ухаанаараа сонгоцгооё! МАН-АН-ын алинаас нь ч айлгүй зоригтой өөрчилцгөөе!
Намбарын Энхбаяр
“Та бидний эвсэл”-ийн тэргүүн, МАХН-ын дарга, Монгол Улсын гурав дахь Ерөнхийлөгч
