БНСУ-д ажиллаж байгаад өндөр хүчдэлд цохиулсны улмаас хоёр гаргүй болсон монгол иргэнтэй БНСУ-ын Үндэсний Ассамблейн дарга Ү Вон Шиг уулзаж, тусалж дэмжихээ илэрхийлжээ.
Өдгөө БНСУ-д гэр бүлийн хамт амьдарч буй Монгол Улсын иргэн Н.Ууганбаяр (солонгос нэр Огина)-ын нэгдүгээр ангийн сурагч охин нэгэн сонины нийтлэлд “Аав гаргүй болоод гунигтай байна” гэж ярилцлага өгчээ. Үүнийг БНСУ-ын Үндэсний ассамблейн дарга Ү Вон Шиг олж уншаад, иргэн Огинатай уулзахаар очсон байна.
Ү Вон Шиг өөрийн цахим хуудсандаа “Аав минь гаргүй болсонд харамсаж байна”. Бага сургуулийн нэгдүгээр ангийн сурагчийн энэ үг зүрхийг минь шархлуулж орхив. Аавынх нь ажиллаж байсан компани 2019 оны 12 дугаар сард 500,000 вон хэмнэх гэж цахилгаанаа таслаагүй. Үүний улмаас охины аав хоёр гараа алдаж, өнөөдөр ч эмчлүүлсээр байна. Шүүхийн шийдвэрээр тус компанийг 200 сая вон төлөх ёстой гэж шийдсэн ч нөхөн төлбөрөөс зайлсхийсээр байна. Үндэсний Ассамблейн даргын хувьд, Солонгос улсын иргэний хувьд би маш их харамслаа.
Осол гарсных дараа ээж нь Монголд байгаа амьдралаа орхиод ирж, эхнэртэй нь хамт асарч буй бөгөөд намайг очиход эхнэр нь уйлсаар, үг дуугарч ч чадахгүй байлаа.
Улсын Их Хурлын дарга болон БНСУ-ын иргэний хувьд үнэхээр уучлал гуйх хэрэгтэй санагдаж, Чусок (Солонгосын хамгийн том баяр) наадмаас өмнө заавал уулзаж, сэтгэлийн дэм өгч, нөхцөл байдлыг биечлэн сонсохоор энэ өглөө эртхэн Сөүлээс гарч, Чончү хот руу зорьж гэрт нь зочиллоо.
Чончү хотын И Гуан Хи, И Ён Хи гишүүд болон Чунбүк мужийн дэд захирагч хамт байлаа. Осол гарсных дараа ээж нь Монголд байгаа амьдралаа орхиод ирж, эхнэртэй нь хамт асарч буй бөгөөд намайг очиход эхнэр нь уйлсаар, үг дуугарч ч чадахгүй байлаа.
Огина ах ослын дараа 10 удаа хагалгаанд орсон бөгөөд одоо хүртэл долоо хоногт хоёр удаа Сөүл хотын Ханган Суншим эмнэлэгт түлэгдэлтийн эмчилгээ хийлгэж байгаа юм. Гэвч гэр бүлийн гишүүдийн визийн асуудал шийдэгдээгүй тул олон бэрхшээлтэй тулгарч байна.
Эхнэр нь хууль бус оршин суугч болсон тул эдийн засгийн үйл ажиллагаа явуулах боломжгүй, эмнэлгийн даатгалд хамрагдахгүй, асар их зовлон туулж байна. Огина ахын эмчилгээний зардлыг хөдөлмөрийн ослын даатгалаас дааж байгаа ч бусад эмчилгээ болон гэр бүлийн гишүүдийн эмчилгээний зардлыг өөрсдөө хариуцах шаардлагатай тул хүнд байдалд оржээ.
Эдгээр асуудлыг холбогдох байгууллагуудтай зөвлөлдөн, шийдвэрлэх арга замыг эрэлхийлэх хэрэгтэй байна” гэж бичжээ.
Мөн иргэн Огинагийн ах “Ердөө 500 мянган воныг хэмнэхийн тулд өндөр хүчдэлээ салгаагүй Солонгосын компанийн буруутай үйлдлээс болж дүү маань насан туршдаа хүний асаргаанд орсон. Солонгосын шүүх шийдэхдээ компанийн эзэнд 6 сарын хорих ял өгөөд өнгөрсөн билээ.
Бие эрхтэн, сэтгэл санаа, хөрөнгө мөнгөний асар их хохиролд амссан дүүг маань БНСУ-ын Үндэсний ассамблейн дарга Ү Вон Шиг ирж бүх талаар тусалж дэмжихээ илэрхийлсэн сайхан мэдээг өнөөдөр хүлээн авлаа” хэмээн бичжээ.
Ташрамд мэдээлэхэд, Бүгд Найрамдах Солонгос Улсын Үндэсний Ассамблейн дарга Ү Вон Шиг энэ оны дөрөвдүгээр сард Монгол Улсад айлчилж байв.
