Бид өмнөх нийтлэлээр Баянгол дүүргийн Эрүүл мэндийн төвийн дарга З.Балдандугар 2021 онд цар тахлын нөхцөл байдлыг ашиглан Монголын Үндэсний их сургууль руу дүүргийн эрүүл мэндийн салбарт зарцуулах ёстой 9 тэрбум төгрөгөөс нэг тэрбум төгрөгийг найман удаагийн гүйлгээгээр шилжүүлж, үүнийгээ шилэн дансандаа ямар гэрээгээр ямар ажил, арга хэмжээнд зарцуулахаар шилжүүлсэн талаараа тусгаагүй ноцтой баримтыг дэлгэсэн.
Тэгвэл энэ удаад Баянгол дүүргийн Эрүүл мэндийн дарга З.Балдандугар нь Эрүүл мэндийн сайд С.Энхболдын ээж Баатарбалын Кумагийн компани руу 30 сая төгрөг шилжүүлсэн баримтыг хүргэж байна.
Баатарбалын Кума нь 2010 оны наймдугаар сард 5401607 регистрын дугаартай “Алтайн хан тайшир” ХХК-ийг өөрийн хүү С.Энхболдын хамтаар байгуулж байжээ. Мөн 2018 онд С.Энхболд 6276385 регистрын дугаар бүхий “Өнө мед” ХХК-ийг байгуулсан байдаг ба 2019 онд дээрх хоёр компанийг ээжийнхээ нэр дээр шилжүүлж, өөрөө эзэмшлээсээ гарчээ. Энэхүү компанийн хувь эзэмшил өөрчлөгдөж, С.Энхболлд команийн эзэмшлээс нэрээ хасуулсан нь түүний улс төрийн албан тушаалтай холбоотой нь мэдээж хэрэг юм.
Харин “Алтайн хан тайшир” болон “Өнө мед” компаниуд эрүүл мэндийн үйлчилгээ үзүүлэх зөвшөөрөлгүй боловч сайдын ээж Б.Кума нь Баянгол дүүрэгт байрлах Эрүүл мэндийн 7 дугаар төвд томограф ажиллуулж ирсэн. Харин энэ үйлчилгээнд зориулж эрхэм эрүүл мэндийн төвийн дарга З.Балдандугар өнгөрсөн онд 30 сая төгрөгийн С.Энхболд сайдын ээж Б.Кума руу шилжүүлжээ. Энэ хугацаа нь С.Энхболд Эрүүл мэндийн сайд болсноос хойшх үйл явдал гэдгийг Шилэн дансны мэдээллээс харж болно.
Өөрөөр хэлбэл С.Энхболд өөрийн эрх мэдлээ ашиглан хамаарал бүхий этгээд буюу ээжийнхээ компанид 30 сая төгрөгийг Баянгол дүүргийн Эрүүл мэндийн төвийн даргаар шилжүүлүүлсэн гэж үзэх бүрэн үндэслэлтэй байна. Нөгөө талаар Монголын үндэсний их сургууль руу нэг тэрбум төгрөгийн гүйлгээ хийхдээ задаргаа, холбогдох гэрээг шилэн дансандаа огт тусгаагүй Эрүүл мэндийн төвийн дарга З.Балдандугар сайдынхаа ээжид саймширч шилжүүлсэн 30 саяа яс баримтжуулан бүртгэж шилэн дансандаа тод томруун байрлуулсан нь даргын суудлаа хадгалж үлдэх “хөзөр” болгож салбарын сайдаа шантаажилах гэсэн санаархал ч байх тал бас бий.
Ямартай ч З.Балдандугар дарга салбарын сайдтайгаа нийлээд дүүргийн эрүүл мэндийн салбарыг самарч, ядарсан иргэдэд очих ёстой эрүүл мэндийн тусламж үйлчилгээг идэж уух ээлжит байгаа болгож байгаа юм биш биз