Монголын Залуучуудын холбооноос цаг үеийн асуудлаар өнөөдөр хэвлэлийн хурал хийлээ.
Тус холбооны ерөнхийлөгч О.Гэрэлт-Од “Ерөнхийлөгчийн санаачилсан “Аp xигүй Монгол” аяныг бид дэмжиж ажиллана. 24 цагийн байдлаар улсын хэмжээнд 208 хүн эрүүлжүүлэгдсэн байна. Согтуурахтай холбоотой 521 дуудлага ирсэн бөгөөд гэр бүлийн хүчирхийллийн 122 зөрчил бүртгэгдсэн.
Цагдаагийн байгууллагад ирсэн нийт дуудлагын 30 хувь нь архидалттай холбоотой байна. 2021 он 533 хүн архинд хордож нас барсан. Нэг жилд дунджаар 70-80 мянган хүн эрүүлжүүлэхэд хонодог гэсэн судалгаа байгаа. Ар хийг ажилгүйдэл, стрессээс болж хэрэглэж байна гэж сошиал орчинд бичиж байна. Яг юунаас болж байгааг бид судална.
Тамхины хайрцаг дээр хор нөлөөг нь бичдэг хэрнээ архины шилэн дээр шүтдэг уул, ус, хаад ноёдынхоо зургийг тавьдаг. Үүнийг өөрчлөхөөс ажлаа эхэлье гэдэг санаачилга гаргаж байна. Хуулийн хүрээнд юмуу ямар хэмжээнд өөрчлөлт орох талаар холбогдох газруудад саналаа хүргүүлж ажиллана.
Архины шилэн дээр хор хөнөөлийг нь ухуулан таниулсан үг, зураг байх ёстой” гэсэн юм.
Мөн тэрээр өөрийн цахим хуудснаа найзынхаа талаар нэгэн мэдэгдэл хийсэн нь олны дургүйцэлийг ихэд төрүүллээ. Тус холбооны ерөнхийлөгч О.Гэрэлт-Од “Анд минь Аp xи наас болж х ү чин хийж, АМЬДРАЛАА үгүй хийсэн. Тэр уухаа больсон!” гэж “Бандааш” хочит УИХ-ын гишүүн асан Д.Гантулгын талаар жиргэсэн юм. Үнэндээ түүний энэ үйлдэл нь найзыгаа магтах гэж байгаад матах гэгч нь болжээ.
Хамгийн залуу гишүүнээр нэрлэгдэж байсан УИХ-ын гишүүн асан Д.Гантулгын хувьд “улаан махны” хэрэгт холбогдож гишүүнээсээ татгалзаж байсныг уншигч та санаж буй биз ээ.Тэрбээр 2019 онд шүүхээс хүчингийн хэргээр хоёр жилийн ял сонсч, 2020 оны арванхоёрдугаар сард магадлангаар суллагдсан юм.
