ОХУ-ын ерөнхийлөгч Владимир Путин зэвсэгт хүчиндээ Донбассын бүс нутагт “тусгай ажиллагаа” явуулах тушаал өгснөө зарласан. Путиний мэдэгдлийн дараа Украины гадаад хэргийн сайд Дмитро Кулеба тус улсад Оросын эзлэн түрэмгийлэл эхэлснийг твиттер хуудсандаа мэдэгджээ.ОХУ-ын ерөнхийлөг Путин Украиныг эзлэн түрэмгийлэх цогц ажиллагааг эхлүүлж дайн эхлүүлээд байгаа билээ. Тэгвэл Ардчилсан нам өөрийн сошиал хуудсаараа дамжуулж мэдэгдэл хийлээ.
Уг мэдэгдэлд:
Сүүлийн хэдэн өдрийн турш В.Путин тэргүүтэй Кремлийн удирдагчид ОХУ-ын армийн бүх хүч хэрэгслээ ашиглан НҮБ-ын гишүүн, тусгаар тогтносон, бүрэн эрхт, ардчилсан Украин улсын эсрэг цэргийн тусгай ажиллагаа нэртэй эзлэн түрэмгийлэх довтолгоо хийж байгааг Монголын Ардчилсан Нам эрс эсэргүүцэн буруушааж байна. Үй олон энгийн номхон иргэдийн амь нас үрэгдэж, эдийн засгийн асар их хор хохирол учруулах аюултай энэхүү үйлдлээ нэн даруй таслан зогсоохыг бид шаардаж байна.
ОХУ-ын энэ алхам нь хэрхэвч зөвтгөх аргагүй бөгөөд Европ болон дэлхий нийтийн энх тайван, тогтвортой байдалд нэн аюултай үйлдэл юм. Энэ хүнд цаг мөчид Монголын Ардчилсан намын гишүүд, дэмжигчид Украины ард түмэнтэй эв санааны нэгдэлтэй байгаагаа илэрхийлж байна.
Улаанбаатар хот
2022.02.28
ОЛОН УЛСЫН АРДЧИЛСАН ХОЛБООНЫ ГИШҮҮН
МОНГОЛЫН АРДЧИЛСАН НАМ
