МҮЭХ-нд үйлдвэрчний эвлэлийн байгууллагаас төрийн үйлчилгээний ажилтнуудын ажлын байрны баталгааны асуудлаар мэдээлж байна. МҮЭ, Сургуулийн өмнөх боловсролын ҮЭ-ийн нэгдсэн хороо, 21 аймгийн үйлдвэрчний эвлэлийн холбооноос мэдээлэл хийн Засгийн газраас төрийн үйлчилгээний ТҮ1-ТҮ3 зэрэглэлийн ажилчдыг гэрээт болгохоор гаргасан шийдвэрээ цуцлахыг шаардсан. Монгол Улсад ТҮ1-ТҮ3 зэрэглэлийн 50 мянган ажилтнууд байдаг ба сургууль, цэцэрлэгийн тогооч, засварчин, галч, үйлчлэгч зэргийг хамруулдаг байна.
“ЦАЛИНГИЙН ДООД ХЭМЖЭЭГ ₮546 МЯНГА БОЛГОЖ БАЙЖ ӨНГӨРСӨН
ХУГАЦААНД БИЙ БОЛСОН ИНФЛЯЦЫГ НӨХНӨ”
МҮЭХ-ны ерөнхийлөгч С.Эрдэнэбат:
-Төрийн үйлчилгээний хамгийн бага албан тушаалд хөдөлмөрлөдөг ажилтнуудыг хувийн байгууллагад гэрээт ажилтан болгох шийдвэр гарсан. Бид оны өмнөхөн энэ талаарх шаардлагыг хүргүүлсэн ба өчигдөр тогтоол гарч бидэнд хариу ирүүллээ.
Төрөх эмнэлэгт очиход 2021 оны 11-р сараас хойш цалингаа аваагүй, нийгмийн даатгалаараа зээл авах бүх эрх нь хаагдсан ажилтан ч байна.
Гагцхүү өөрийн хүсэл сонирхолд нийцүүлж, сайн дурын үндсэн дээр бусад байгууллага болон хувийн хэвшилд харьяалагдан ажиллах боломжтой гэжээ. Хэрэв ийм сонголт хийсэн тохиолдолд цалинг бууруулахгүй харин нэмнэ гэдэг тодорхойлолт гарсан. Гэхдээ энэхүү шийдвэр нь өнөөг хүртэл хөрсөн дээрээ хэрэгжихгүй байна.
Төрийн албаны ажилтнуудын цалин зарим нь өнөөг хүртэл буугаагүй байна, буусан ч ямар нэгэн урамшуулал, нэмэлтгүй зөвхөн үндсэн цалинг өгчээ. Жишээ нь цэцэрлэгийн ажилтан 40 хоног хүлээж байж 400 мянган төгрөгийн цалинг авчээ. Мөн өчигдөр II төрөх эмнэлэгт очиход 2021 оны 11-р сараас хойш цалингаа аваагүй, нийгмийн даатгалаараа зээл авах бүх эрх нь хаагдсан ажилтан ч байна.
Цалин хөлсийг дутуу олгодог, хоцроох асуудал их байна. Зөвхөн үндсэн цалинг олгоод үлдсэн нэмэлт, урамшууллыг хэн авав. Үүнийг тогтоож, зөрчлийг илрүүлэхгүй бол бид тэмцлийн дараагийн шатанд орохоо мэдэгдэж байна. Засаг нэг шийдвэр гаргадаг түүнийг нь хэрэгжүүлэхдээ нугалаа гаргаж ядарсан ажилтны цалингаас хумсалдгийг эсэргүүцэж байна.
Нэг хүний цалинг тавихын тулд дунд нь хэд хэдэн шат дамжиж “цавчаа” хийдэг үзэгдэл байна. Тиймээс нийслэл, орон нутагт засаг захиргааны нэгжийн бүтцийг өөрчлөх шаардлагатай байна. Өөрөөр хэлбэл нэг ажилтны цалинг өгөхийн тулд гурван өөр газраас бүрдүүлдэг “дампуу” системээ өөрчил. Энэ нь ч хүнд суртлыг улам нэмж байна.
Цалин тэтгэвэр нэмбэл хүнс, барааны бүтээгдэхүүний үнэ өснө гэдэг нь цалинг нэмэхгүй байх сонирхолтой улстөрчдийн тархи угаалт.
Цалингийн доод хэмжээг 546 мянган төгрөг болгож байж өнгөрсөн хугацаанд бий болсон инфляцыг нөхөх нь ээ. Цагийн хөлс 86 цент байна. Цалингаа инфляц нөхөх хэмжээний дүнгээр нэмээд өгөөч ээ. 1,8 их наяд орчим төгрөгийг цөөн хэдэн хүмүүс Хөгжлийн банкаар дамжуулан хуваагаад иджээ. Хамгийн сүүлд төрийн албаны ажилтнуудын цалинг 2020 онд найман хувиар нэмсэн.
Цалин тэтгэвэр нэмбэл хүнс барааны бүтээгдэхүүний үнэ өснө гэдэг нь цалинг нэмэхгүй байх сонирхолтой улстөрчдийн тархи угаалт юм. Цалин хөлс нэмээгүй байхад инфляц 40-60 хувь өсчихлөө. 2020 онд цалинг найман хувь нэмснээс болоод одоогийн инфляц өссөн гэж харж болохгүй. 2015-2017 онд бараг гурван жил цалин нэмээгүй байхад инфляц бараг 50 хувьд хүрсэн.