Монголд нэг үе гадаадын алдарт дуучид, оддын даллага авсан мэт дуучин Филипп Киркоров, Алсу, Демисс Росс, DJ Бобо, “Виагра” хамтлагийнхан зэрэг дэлхийд танигдсан алдартнууд шил дараалан ирсэн.
“Виагра” хамтлагийнхан намрын сэрүү унасан хойно, есдүгээр сард ирсэн болохоор Төв цэнгэлдэхийн задгай талбайд хийсэн тоглолтын үеэр хагас нүцгэн шахуу “Виагра” хамтлагийнхан даарч, нэг цаг гаруйхан хугацаатай тоглосон.
Дараа нь 100 долларын такстай хүлээн авалтанд цөөнгүй хүн ирсэн боловч “Виагра” хамтлагийнхан орж ирчихээд “Даарч байна, ядарлаа” гэж ялархаад ширээн дээр тавьсан хоол унд, элдэв амттанд ам ч хүрэлгүй гарч, 100 долларын такс авсан хүмүүс сэтгэл дундуурхан үлдсэн. 2004 оны 100 доллар гэдэг бага мөнгө биш.
Харин “Виагра” хамтлагийнхны тоглолтыг зохион байгуулсан хүмүүс нэгэнт л шоу ертөнц юм хойно, элдэв санал санаачилга нэвтрүүлж, олон бизнесмэнийг “Виагра” хамтлагийнхнаар дамжуулж татахаар 100 долларын такстай үдэшлэг зохиосон билээ.
Тэр үеэр “Монгол газар”-ын Мянганбаяр “1000 доллар төлбөл “Виагра” хамтлагийн гишүүн Вера Брежневаг нэг үнсэж болох уу” гэж асууж байсан тухай зохион байгуулагч нь сонинд ярилцлага өгч байсныг зарим хүмүүс санаж байгаа байх.
Зохион байгуулагчид болохгүй юм байхгүй гэж төлөвлөж байсан ч Төв цэнгэлдэхэд намрын хүйтэн үдэш хагас нүцгэн дуулсан хүүхнүүдийн бие нь муудаж, өөрсдөд нь зориулсан хүлээн авалтад удаан саатаагүй буцсан.
Даарсан од хүүхнүүд ер нь муухай аашилж, таагүйхэн загнасаар буцсан гэдэг. Ц.Мянганбаяр захирал 1000 доллар төлж, “Виагра” хамтлагийн хамгийн сайхан бүсгүйг үнсэх аз дутсан хэрэг. Тэр үед “Монгол газар”-ын захирал Ц.Мянганбаяр Топ модель Д.Пүрэвсүрэнтэй амьдардаг байсан билээ. Гэсэн ч сайхны өмнө харц буруугүй болохоор Оросын цагаахан хус шиг Вера Брежневаг илүү харж, нүд унагаж явсан нь тэр байх.
