55 мянга гаруй үзмэртэй Монголын үндэсний музейгээс 400 гаруй дансны 1000 гаруй үзмэр хулгайд алдагдсан гэх хэрэг 2007 онд мандаж, энэ хэрэгт тэр үеийн музейн сан хөмрөгийн эрхлэгч Б.Энхбат агсан болон иргэн Ж.Мөнхбат, Ё.Дамдиндорж нарын нэр бүхий хүнийг холбогдуулж я.л оноосон байдаг.
Гэвч хэгийг эргэн харахад уг бүлэг хулгайг тухайн үед тус музейн захирлаар ажиллаж байсан О.Очир гардаж хийсэн байх үндэстэй ч я,лаас мултарч, уснаас хуурай гарсан нь өдгөө анхаарал татах болжээ. Учир нь гурван шатны шүүхийн тогтоол гарч нэр бүхий хүмүүс я,л аваад явсны дараа хил давуулаад зарчихсан гэх үзмэрүүдийн зарим нь гэнэт музейдээ хүрээд ирчихсэн.
Өөрөөр хэлбэл хэрэг бишдээд ирэхэд хуулийн гадна үлдсэн хулгайчид сандрахдаа хил давуулж амжаагүй үзмэрүүдийг буцааж байранд нь тавьсан байх магадлал зүй ёсоор бий болсон. Тиймээс энэхүү хэргийг сэргээж, гол хүмүүсийг дахин шалгаж, үнэн зөвийг тодруулах шаардлага өдгөө бий болжээ. Гол хүний магнайд мэдээж тухайн үеийн удирдлага О.Очир байх нь эргэлзээгүй юм.
2010 онд энэхүү хосгүй өв соёлын хил давуулан хууль бусаар дамласан бүлэг хулгайн гар хөл болсон байж болзошгүй Б.Энхбат агсныг 2004-2007 оны хооронд өөрийн итгэмжлэн хариуцаж байсан сан хөмрөгөөс удаа дараагийн үйлдлээр 410 дансны 1004 ширхэг түүхийн үнэт үзмэр болох эд өлгийн зүйлийг хууль бусаар авч завшиж, үрэгдүүлэн 10 тэрбум 187 291083 төгрөгийн буюу онц их хэмжээний хохирол учруулсан гэмт хэргийг үйлдсэнд тооцсон.
Улмаар гурван шатны шүүх хэргийг хэлэлцэж, Эрүүгийн хуулийн 150 дугаар зүйлийн 150.3-т зааснаар Б.Энхбатад 10 жил, Ж.Мөнхбатад 6 жилийн я.лыг оноосон ч бүгдэд өршөөл үзүүлж 3 жилийн я.лыг хэрэгсэхгүй болгосон. Улмаар Б.Энхбат болон иргэний хариуцагч Ё.Дамдиндорж нараас тус тус 4 тэрбум 564 274 648 төгрөг, нийт 9 тэрбум 128 549 297 төгрөгийг Үндэсний музейд олгохоор шийдвэрлэсэн байдаг ч өнөөдөр хохирлыг барагдуулсан эсэх нь тодорхой биш байна. Үхсэн хүн үг хэлэхгүй ч, хуулийн ертөнцөд хэрэг хуучирдаггүй.
Тиймээс энэхүү улс, үндэстний эсрэг түүх, өв соёлын аймшигт хулгайг өнөөдөр сэргээж, дахин шалгах болсныг учир мэдэх хүмүүс хэлж байна. Эргэн сануулахад Үндэсний музей 2008 оны тооллогоор 15,119 дэсийн 46,500 ширхэг үзмэртэй гэж тоологджээ. Харин 2012-2014 оны улсын тооллогоор тус музей 18,897 дэсийн 55,572 үзмэртэй гэж тоологджээ. Юун зөрүү гараад ирэв гээд хайтал алга болсон, хулгайд алдсан өнөөх 1004 ширхэг үзмэрийн 69 нь шинэ тооллогоор эргээд гараад ирсэн байдаг. Хулгайлсан үзмэрүүд дотор ховор бурхад, анхны мөнгөн тэмдэгтийн загвар, хэд хэдэн тамга гээд олон сонин үзмэр байв.