Түүнийг ХЭСГИЙН АХЛАГЧ болго
УИХ-ын нөхөн сонгуулийн сурталчилгаа эхэлчихсэн нэр дэвшигчид нь айл, өрхийн усыг авч, түлээ, нүүрсийг зөөх нь холгүй гүйж явна. Тэдний нэг нь А.Отгонбаатар. Олон нийт бол “ХАЛАД”-тай жагсагч гэдгээр нь сайн мэдэх биз.
Гэвч олон нийт, сонгогчдын өмнөөс хариуцлага хүлээж, тэднийг төрд төлөөлөх хүний хийх ажил, хэрэгжүүлэх үйл явц нь тусдаа хуулиар зохицуулагдсан байдаг. Гэтэл мань А.Отгонбаатарын хувьд бусдад таалагдаж, санал авахаар л байвал юуг ч хийнэ гэх болжээ. Ямартаа л сайжруулсан шахмал түлшний хомстлыг ашиглаад өөрийгөө рекламдаж байх вэ дээ. Уг нь сайжруулсан шахмал түлшний үйлдвэр улсын онцгой обьект учраас хэн дуртай нь тэнд очиж, цээжээ дэлдэх ёсгүй.
Тэгээд ч сайжруулсан шахмал түлшний үйлдвэрлэл хэвийн бөгөөд борлуулалтын асуудал үүсч байгааг холбогдох албаныхан тайлбарласан. Гэтэл ийн бусдын хэрэгцээнд тулгуурласан бухимдлаар “шоу”-даж байгаа нь мань хүн УИХ-ын гишүүн болохын тулд ямар их хичээж буйг харуулах биз.
Харамсалтай нь хийж буй үйлдэл нь түүнийг УИХ-ын гишүүн бус ердөө л нэг хорооны ХЭСГИЙН АХЛАГЧ болж, иргэдэд тулгамдаж буй асуудлыг эхнээс нь шийдвэрлэхэд дэм болоход тун хэрэгтэй нэгэн гэдгийг харуулсаар байна.
Угаас А.Отгонбаатарын хувьд иргэдийн төлөө, олон нийтийн төлөө, авлигачдын эсрэг, улстөрчдийн булхай луйврын эсрэг гэх үгсийг байнга хэрэглэж жагсана, тэмцэнэ гэдгээрээ алдаршсан.
Тэгж иргэдийн тархийг угааж, бухимдлыг нь дээд цэгт нь хүргэж байж өөрөө нэр хүнд олохдоо гаршсан гэх үү дээ.
Мань хүн уг нь УИХ-ын 2020 оны сонгуульд Өвөрхангай аймагт нэр дэвшиж явсан. Харин одоо нөхөн сонгуулиар ч болов УИХ-ын гишүүн болох гэж өөрийгөө сурталчилж яваа. Тэгэхээр түүнийг УИХ-ын гишүүн болгохоос урьтаж, ядаж ХЭСГИЙН АХЛАГЧ болгож төлөвшүүлсэн нь дээр ч юм шиг ээ.
