Зам, тээврийн яамнаас салбарын үйл ажиллагааг иргэд, олон нийтэд нээлттэй, ил тод хүргэх, мэдээ мэдээлэл өгөх зорилгоор Монгол Улсын ерөнхий сайдын санаачилсан “ЧӨЛӨӨЛЬЕ” аяны хүрээнд гурван өдрийн турш Д.Сүхбаатарын талбайд “Нээлттэй хаалганы өдөрлөг”-ийг зохион байгууллаа.
Энэхүү өдөрлөгт “Иргэний нисэхийн үндэсний төв” ТӨХХК иргэд, олон нийтэд өөрсдийн үйл ажиллагаагаа нээлттэй танилцуулж оролцсон юм. Компанийн үйлдвэрлэлийн үйл ажиллагааны мэдээллийг болон “Буянт-Ухаа” олон улсын нисэх буудлын үйл ажиллагааг танилцууллаа. Иргэдийн хамгийн ихээр сонирхон асуудаг асуултуудад хариулт өгөх, үзүүлэн материалууд ашиглан үйл ажиллагаагаа сурталчлан таниулахын сацуу өнөөдөр буюу 2026.06.17-ны өдөр компанийн танилцуулгыг төв тайзнаа хийсэн юм.
Танилцуулгын эхэнд ЗТЯ-ны Иргэний нисэхийн бодлого зохицуулалтын хэлтсийн дарга З.Туяа иргэний нисэхийн салбарын үйл ажиллагааны талаар товч мэдээлэл өгч, “Иргэний нисэхийн үндэсний төв” ТӨХХК-ийн гүйцэтгэх захирал Э.Энхзориг нээж үг хэллээ. Тэрээр “Иргэний нисэхийн үндэсний төв” ТӨХХК-д 2026 оноос агаарын навигацийн хураамжийн орлого төвлөрч эхэлсэн таатай мэдээг дуулган, олон улсын иргэний нисэхийн байгууллагын аудит шалгалтын хүрээнд Зам, тээврийн яам, Иргэний нисэхийн ерөнхий газар болон агаарын тээвэрлэгчдэдээ олон улсын аудит шалгалтад амжилттай хамрагдсанд баяр хүргэн, талархал илэрхийллээ. Мөн компанийн зүгээс хүн төвтэй үйлдвэрлэлийн үйл ажиллагааг дэмжиж ажиллах томоохон ажлууд хийхээр төлөвлөж байгаагаас агаарын навигацийн тоног төхөөрөмжийн шинэчлэл хийх, орон нутгийн нисэх буудлуудыг хөгжүүлэх ажлын хүрээнд 4 нисэх буудалд төр хувийн хэвшлийн түншлэлийг хэрэгжүүлэх зэрэг ажлуудыг төлөвлөж байгаа талаар дурдлаа.
Мөн тус өдөрлөгийн үеэр “Иргэний нисэхийн үндэсний төв” ТӨХХК-ийн Нисэхийн аюулгүй байдал, хамгаалалтын албаны зүгээс “Тэсрэх бодис илрүүлэгч нохойн үзүүлбэр” үзүүлсэн. Нислэгийн хөдөлгөөний үйлчилгээний алба болон аэродром, гэрэл суултын албанаас нислэгийн хөдөлгөөний удирдагч болон гэрэл суултын инженер мэргэжлийн танилцуулга хийн, ажилтнууд хуран цугласан олонд өөрсдийн ажил мэргэжлийн онцлогоос танилцуулан, ярилцлаа.
