УИХ дахь Ардчилсан намын бүлгээс Хөгжлийн Банкны чанаргүй зээлийн асуудлаар түр хороо байгуулахаар болсон талаар Төрийн ордонд мэдээлэл хийв.
Энэ үеэр тус бүлгийн дарга Д.Ганбат Украин улсад болж буй үйл явдалтай холбогдуулан байр сууриа илэрхийллээ.
Тэрбээр “Би Украины Киев хотод таван жил суралцсан. Олон мянган монгол иргэн тэнд суралцаж байсан. Энэ утгаараа дүрвэгсдэд туслах үүднээс миний бие хүмүүнлэгийн аянд нэгдэх ёстой гэж үзэн, нэг сарын цалингаа хандивлаж байна. Мөн Mонголчуудаа уриалж байна” гэв.
Холбоотой мэдээ: Орос-Украины талууд дахин уулзаж, хүмүүнлэгийн коридор гаргахаар тохиролцлоо
Беларусийн хил орчимд Орос-Украины талууд хоёр дахь шатны уулзалтаа хийж, иргэдийг нүүлгэн шилжүүлж, дайны талбарт эм, эмнэлгийн хэрэгсэл хүргэх хүмүүнлэгийн коридор гаргахаар тохиролцлоо.
Мөн хэлэлцээний үр дүнд нүүлгэн шилжүүлэх ажиллагаа явуулах үеэр тухайн нутаг дэвсгэрт түр хугацаанд гал зогсоох боломжийн талаар ярилцахаар болсон байна.
Украины Ерөнхийлөгчийн Тамгын газрын даргын зөвлөх Михаил Подоляк “Талууд хүмүүнлэгийн асуудлыг хангалттай хэмжээнд нарийвчлан авч үзсэн ч Украины тал хүлээж байсан үр дүндээ хүрсэнгүй” гэж сэтгүүлчдэд хэлжээ. Харин ОХУ-ын Ерөнхийлөгчийн туслах Владимир Мединский хэлэлцээнд “чухал ахиц дэвшил гарлаа” гэв.
Гурав дахь шатны уулзалт ойрын өдрүүдэд болох бөгөөд товыг хараахан зарлаагүй байна.
Эх сурвалж: ВВС
