Сэлэнгэ аймгийн Засаг дарга Ш.Оргил үндсэн ажлаасаа чөлөөлөгдөх хүсэлтээ өгөөд байгаа. Тодруулбал, тэр эрүүл мэндийн хувьд урд удаан хугацаанд эмчлүүлэх шаардлагатай. Гэвч эх сурвалжуудын хэлж буйгаар Ш.Оргил дээрх шалтгаанаас гадна АТГ-т шалгагдаад багагүй хугацааг өнгөрүүлж буй аж. Түүгээр ч зогсохгүй эрүүл мэндийн шалтгаанаар хэмээн ажлаа өгч байгаа учраас түүнийг гадаадад зорчихоос сэргийлэн хилийн хориг тавьжээ.
Ш.Оргил 2016 оноос эхлэн Сэлэнгэ аймгийн Засаг даргаар ажиллаж байгаа бөгөөд өнгөрсөн хугацаанд орон нутгийн уул уурхайн орд, энэ чиглэлээр үйл ажиллагаа явуулдаг аж ахуйн нэгжүүдтэй ихэд “дотно” байсан нь ийн АТГ-аар ойр ойрхон эргэлдэхэд хүргэжээ.
Зарим эх сурвалжийн хэлж буйгаар Ш.Оргилыг эрүүл мэндийн шалтгаанаар ажлаа өг гэдгийг МАН-аас шахсан гэх. МАН эрх барьж буй энэ цаг үед “том” эрх мэдэл атгасан дарга нар нь эрх мэдлээ урвуулан ашигласан эсвэл хээл хахуулийн гэх хэрэгт ар араасаа холбогдож байгаа учраас ядаж нэгийг нь ч болов өөр шалтгаанаар ажлаас нь холдуулж байгаа хэрэг. Юутай ч МАН-ын удирдлагууд Сэлэнгэ аймгийн Засаг дарга гэх хүндтэй албан тушаалаас бууж шалгагдахын зэрэгцээ эрүүл мэнддээ анхаарчих, дараа нь асуудал эерэгээр шийдэгдвэл өөр “юм” бодъё гэх тохироог хийсэн байна.
Ш.Оргилын хувьд бөөрний хавдартай байсан төдийгүй хагалгаа хийлгээд удаагүй байхдаа коронавирусын халдвар, тархалтаас үүдэн аймгийн Засаг дарга, Онцгой комиссын даргын хувиар удаан хугацаанд эмчилгээний гам алдсан гэдгийг зарим эх сурвалж баталж байгаа юм. Ш.Оргилыг өмнө нь буюу 2019 оны 10 дугаар сард мөн л АТГ-аас шалгаж, гэр болон ажлын өрөөнд нь нэгжлэг хүртэл хийж байв. Тухайн үед түүнийг Монгол орны ховор ургамлын жагсаалтад багтсан дэрвэгэр жиргэрүүг хууль бусаар борлуулсан гэх хэрэгт холбогдуулан буруутгаж, шалгаж байсан билээ.
