Монголын үндэсний бөхийн барилдаанд П.Сүхбат, А.Сүхбат гээд хоёр сайхан бөх нэгэн үед барилдаж, монгол бөхийн түүхэнд үлдэнэ. Пунцагийн Сүхбат гарьдыг Арслан цолны болзол хангасан гэж бөх сонирхогчид түүхчид үздэг, харамсалтай нь энэ цолыг нь өгөөгүй байсаар ертөнцийн мөнх бусыг үзүүлсэн билээ. Тиймээс унасан ч, давсан ч инээж явдаг сайхан монгол эрийн төрхтэй П.Сүхбат гарьд “Надад арслан цол өгөх болов уу гэж их харсан. Одоо нас ахисан, Америкт их удсан болохоор барилдаад арслан цол авч чадахгүй. Тиймээс цээжиндээ арслангийн дүртэй шивээс хийлгэсэн” гэж ярилцлага өгч байлаа.
МУГТ, Улсын гарьд Пунцагийн Сүхбатын музейг нээж, нэрэмжит барилдаанд төрсөн нутагт Баянхонгор аймагт болсон. Уг барилдаанд Улсын харцага Д.Батболд, Н.Золбоо, Т.Бэгзсүрэн, Улсын начин Б.Баянжаргал, Б.Сангисүрэн, Б.Хишигбаатар, Д.Цэрэнтогтох нарын улс аймгийн алдар цолтой 128 бөх барилдсан юм. 
Хүчит 128 бөхийн барилдаанд Баянхонгор аймгийн Заг сумын уугуул, Улсын начин Д.Цэрэнтогтох түрүүлж, Ховд аймгийн “Ховд” бөхийн дэвжээний бөх Аймгийн арслан Б.Баянмөнх үзүүрлэж, Улсын харцага Н.Золбоо, Аймгийн арслан Б.Эрдэнэхүү нар шөвгөрсөн байдаг.
Мөн Баянхонгор аймгийн ИТХ, ЗТДГ, БТСГ болон үндэсний бөхийн салбар холбооноос П.СҮХБАТ агсны гэр бүл үр хүүхдэд хүндэтгэл болгож, таван сая төгрөгийг өгсөн юм. 
Мөн П.СҮХБАТ агсны гэргий Сарангэрэл ханийнхаа Монгол улсын Гарьдийн өмсгөл буюу зодог шуудгийг нь төрөлх нутаг усных нь музейд хадгалуулжээ.
