Монгол улсын ерөнхий сайдаар сонгогдоод байгаа Л.Оюун-Эрдэнийг МАН-ын Удирдах зөвлөлөөс нэр дэвшүүлж 100 хувийн саналаар дэмжсэн нь ерөнхий сайд асан У.Хүрэлсүхийн санаачлага байжээ. Э.Оюун-Эрдэнэ нь У.Хүрэлсүхтэй нэг нутгийнх аж. Тодруулж хэлбэл, Хэнтий аймгийн угшилтай гэсэн үг.
Л.Оюун-Эрдэнэ нь Улс төрд асар богино хугацаанд тодорч, чамлахааргүй өндөрт гарсан нэгэн. Эхний сонгуулиараа УИХ-д сонгогдож, удалгүй Монгол Улсын сайд, ЗГХЭГ-ын дарга болно гэдэг хэн хүнд олдох завшаан биш. У.Хүрэлсүхийн сайн дүү гэгдэж, улс төрд сайн ахын буянаар орж ирсэн гэдэг ч амжилт олж, карьер нь ахихын хэрээр нийгэмд дуулиан шуугиан дэгдээж болох ямар л сэдэв байна, түүн рүү үсчиж, попордог гэх шүүмжлэлд байнга өртдөг. Алхам тутамдаа хэвлэлийн хурал зарлан, өөрийгөө тодруулах оролдлогыг хийж ирсэн нэгэн.
Уг нь 2017 онд “Шинэ Засгийн газар” буюу У.Хүрэлсүхийн Засгийн газар бүрдэж эхэлж байхад УИХ- ын гишүүн байсан Л.Оюун-Эрдэнэ сайд дарга болох сонирхолгүй байгаа тухайгаа хэвлэлд дурдаж байв. Тэрээр тухайн үед “Албан тушаалын төлөө биш ард түмний төлөө салбараа аваад явах зангарагтай хүмүүс нь сайд болох ёстой. Адаглаад Ерөнхий сайд нь улс төрчдийнхөө эхний арав дотор рейтингийн судалгаагаар байж байх хэрэгтэй. Салбарын сайдууд нь эхний 30 дотор байдаг улс төрчид байх ёстой. Хөдөө орон нутагт Ерөнхий сайдыг танихгүй байна. Олон улсад Засгийн газрын рейтинг 50-иас доош хувьтай болоод ирвэл өөрийн хүсэлтээр огцордог. Би сайд, дэд сайдын албан тушаалд оролцохгүй гэдгээ илэрхийлсэн” хэмээж байсан юм.
Өөрийнх нь хэлснээр, хүссэнээр болохгүй нь. Намынхныхаа даалгавараар ч гэх үү, өөрийнхөө Монгол Улсын сайд, ЗГХЭГ-ын дарга хүртэл дэвшчихсэн зангаргаар ч гэх үү дараагийн Ерөнхий сайдаар энэ өдөр МАН-ын УЗ-ийн 100 хувийн саналаар Монгол улсын шинэ ерөнхий сайдаар тодорч байна.
Ингээд Лувсаннамсрайн Оюун-Эрдэн-ийн товч намтрыг хүргэж байна.
Овог нэр: Хурц овогт Лувсаннамсрайн Оюун-Эрдэнэ
Төрсөн он, сар, өдөр: 1980.06.29
Гэр бүл: Ам бүл 5 эхнэр хүүхдүүдийн хамт амьдардаг
Боловсрол:
- 1998 онд Хэнтий аймгийн Бэрх хотын Ерөнхий боловсролын сургууль
- 2001 онд Бэрс дээд сургуулийг сэтгүүлч мэргэжлээр
- 2008 онд МУИС-ийн Хууль зүйн сургуулийг Эрх зүйч мэргэжлээр тус тус төгссөн.
- 2015 онд Харвардын Их сургуульд Төрийн удирдлагын магистрын зэрэг хамгаалсан.
Ажлын туршлага:
- 2001 он Хэнтий аймгийн Бэрх хотын захирагчийн албанд Тамгын газрын дарга
- 2002 он “Дэлхийн Зөн Монгол” ОУБ-ын Хэнтий салбарын захирал
- 2006 он “Дэлхийн Зөн Монгол” ОУБ-ын Бүс хариуцсан Захирал
- 2008 онд Нийслэлийн Баянзүрх дүүрэгт Нийгмийн хөгжлийн хэлтсийн дарга
- 2009 онд Монгол Ардын Намын Удирдах Зөвлөлийн Хэрэг эрхлэх газрын дарга
- 2010-2014 он Нийгмийн Ардчилал Монголын Залуучуудын холбооны Ерөнхийлөгч
- 2011 он Монгол Ардын Намын Нарийн бичгийн дарга
- 2012 он Монгол Ардын Намын Ерөнхий нарийн бичгийн даргын үүрэг гүйцэтгэгч
- 2016 оноос Монгол Улсын Их Хурлын гишүүн
- 2019 оноос Монгол Улсын сайд, Засгийн газрын Хэрэг эрхлэх газрын дарга
- 2020 оноос Монгол Улсын Их Хурлын гишүүн
Сонгуульт ажил:
- “JCI Монгол” Үндэсний байгууллагын Эрх зүйн зөвлөх
- “Азийн хүлэг улс” бодлогын судалгааны хүрээлэнгийн үүсгэн байгуулагч
- “Монголын зүрх Хэнтий” төслийн удирдагч
Бүтээл:
- “Алсын хараа” ном 2005
- “Азийн хүлэг улс” ном 2015 он