ЗГХЭГ-ын дарга Л.Оюун-Эрдэнэ Ерөнхий сайд асан Ж.Эрдэнэбатын асуудлаар мэдэгдэл, ярилцлага хийх болсон. Тухайлбал түүнийг улс төрийн захиалгаар хэлмэгдсэн гэх Олон улсын Парламентын холбооноос ирүүлсэн дүгнэлттэй санал нэгдэж буйгаа илэрхийлэх, хамтран ажиллах ярих болсон. Түүний энэ мэдэгдэл улс төрийн хүрээнд доргилт авч ирэх бөгөөд захиалагч, гүйцэтгэгч гээд нэлээд газар авах магадлалтай юм. Нөгөөтэйгүүр аль зүг рүү тавьсан сум вэ гэх улс төрийн таамаг ч үүсээд байна. Түүний Зууны мэдээ сонинд өгсөн ярилцлагаас түүвэрлэн хүргэлээ.
- Монгол Улс ардчилсан парламентын засаглалтай байх уу, үгүй юу гэдэг асуудал үүсэхээр байна. Хоёрдугаарт, хамгийн хэцүү нь улс төрийн захиалгаар хүн хэлмэгдүүлсэн үү гэх асуудал. Нэг үгээр хэлбэл хэн нэгэн улс төрд нөлөө бүхий этгээд шүүхэд нөлөөлж, энэ асуудалд хөндлөнгөөс оролцсон гэх таамаг бий. За энэ байдал тогтоогдвол захиалсан субьект дээр асуудал үүснэ. Ер нь бол монгол улс ардчилсан улс, ардчилсан улсад хэн нэгэн хүн хэлмэгдэх ёсгүй.
- Хэрвээ хуулийн процедурын дагуу бус, алдаа гарсан гэж үзвэл энийг бид нар нягтлаад, цаашаагаа ийм байдлаар хууль зөрчигдөхгүй байх асуудлыг бид нарын хувьд хамтдаа хамгаалж авч явах ёстой.
- Тэгэхгүй бол энийг бид нар хараагүй юм шиг, сонсоогүй мэт өнгөрчихлөө гэж бодъё. Дараа нь ахиад ийм асуудал үүснэ. Миний баримталдаг зарчим бол аливаа нэг зүйл буруу хийгдээд явчихвал цаашдаа буруу л болдог гэж үздэг.
- Би бас хэд хэдэн жишээг ажиглаж байна л даа. Анх Н.Төмөрхүү, С.Чинзориг гэдэг хоёр хүн ард түмнээс олонхийн санал авчихсан байхад олонхийн санал аваагүй өөр хоёр хүнийг тухайн үед ерөнхийлөгчөөр ажиллаж байсан хүн нөлөөлөөд парламентын гишүүн болгож байсан. Дэлхийд анх удаа гарсан кэйс шдээ. Хан-Уул дүүргийн шүүх дээр ийм шийдвэр гаргаж байлуу даа. Тухайн үед нийгэм шүүмжлэлтэй хандаж байсан ч тэгсхийгээд өнгөрөөснөөс болж өнөөдөр дахиад ийм асуудал үүсч байна гэсэн үг.
- Тэгэхээр өнөөдөр Ж.Эрдэнэбат гишүүнтэй холбоотой асуудлыг хараагүй, сонсоогүй юм шиг өнгөрвөл, дараа нь цаашаа хөгжөөд жишээлбэл нэг өдөр магадгүй цөөнх дээр 4-5 хүн дээр ийм асуудал үүсгэхийг үгүйсгэх аргагүй. Тийм учраас энэ олон зүйл дээр бид нар зөвхөн хуулийн хүрээнд ажиллахаас өөр гарц үгүй.
- Их хурлын гишүүн ч бай, МУ-ын Ерөнхийлөгч ч бай, МУ-ын Ерөнхий сайд ч бай, МУ-ын тангараг өргөсөн шүүгч ч бай хэн ч хуулиас дээгүүр гишгэх эрх мэдэлгүй. Иймд бид нар энэ гажуудлыг зогсоох ёстой гэж хэлж байгаа юм.