Нам төрийн удирдагч Юмжаагийн Цэдэнбал агсаны гэргий Анастасия Цэдэнбал Филатовагийн үүсгэн байгуулсан “Хүүхдийн төлөө фонд”-ыг Х.Баттулгын санаачилга, дэмжлэг дор дахин байгуулав. Тус фондын хөрөнгө босгох ажлыг олон зуун иргэд дэмжиж 1000 төгрөгнөөс эхлээд эд материалын хандив хүртэл өргөсөн байдаг юм. Үнэхээр олон хүний дэмжлэг хүлээсэн, сэтгэл сэргээсэн үйл явдал байлаа. Гэтэл АН болоод УИХ-ын гишүүдэд энэхүү үйл явдал таалагдаагүйгээр барахгүй баларч унасан социалист нийгэм рүү эргэн орлоо хэмээн буруутгалаа.
Хамгийн гайхалтай нь УИХ-ын гишүүн Норовын Алтанхуяг “Социалист реализмын маш том суртал нэвтрүүлэг явуулж хандив цуглууллаа. Өчигдөр би нулимс гарган уйллаа” хэмээн чуулган дээр хоолойгоо чичрүүлж байх юм. Огт ойлгосонгүй. Иргэд сайн дураараа хандив өргөсөн болохоос дээрэмдсэнгүй, булаасангүй, авлига авсангүй байтал яагаад улс төрчид уурлана вэ.
Н.Алтанхуягийн хувьд “Нутгаасаа төрсөн их удирдагчийн үйл хэргийг сэргээж байхад талархаж баймаар”. Ямар мөнгө хулгайлсан биш, дээрэмдсэн биш, хүн үхээгүй байхад юунд уйлж гашуудна вэ. Хүүхдийн төлөө фондод цугласан мөнгөөр Найрамдал зуслан шиг, Урлан бүтээх төв шиг, Хүүхдийн ордон шиг барилга барьж чаддаггүй юм гэхэд авьяаслаг хүүхэд багачуулыг дэмжих, хамгаалах төвийг барихад чиглэсэн үйл ажиллагаа явуулж болно доо.
“Хүүхдийн төлөө фонд” байгууллагдсанд нэг нь баярлаад уйлж байхад нөгөөх нь гомдоод уйлж байх. Улс төрчид гэж ойлгомжгүй, тэс өөр хүмүүс байх юм. Хүргэн, охин, ах эгч, зөвлөх нараа авлига авсан, хулгай хийсэн гээд баригдаад шорон руу явахад нулимс гаргаж байгаагүй Н.Алтанхуяг нутгийн удирдагчийнхаа гэргийн нэрэмжит фонд сэргэхэд “Социалист нийгэм эргэн ирлээ” хэмээн гашуудан уйлах. Нэг фонд байгуулаад нийгэм солигдчихдог бол ард түмэн “Цагаан цаас” юм байна. АН-ынхан Ерөнхийлөгчөө санаачилсан фондыг эсэргүүцэж буйг улс төрийн дотоод үймээнтэй нь холбон ойлгох уу даа.
