-МОНГОЛ УЛСЫН НЭР ХҮНД УЛС ТӨРЧӨӨС ХЯМД БАЙЖ БОЛОХГҮЙ-
БНХАУ эрүүгийн хуулиндаа сонирхолтой заалт оруулсан байна. Энэ юу вэ гэвэл тамирчинд хориотой эм бодис хэрэглэхийг зөвлөсөн, хэрэглүүлсэн, хорлосон, ятгасан багш, дасгалжуулагч, эмч зэрэг нөхдөд я.л шийтгэл ноогдуулахаар болжээ. Тамирчин хүний хувьд өөрөө допинг хэрэглэх нь дэлхийн хууль тогтоомжоор шийтгэл явагдах учраас орхисон гэнэ.
Монгол Улсад сэргээш хэрэглэсэн тамирчин хүнийг уруу татдаг нөхөд бол дасгалжуулагч, эмч, найз нөхөд, компанийн захирлууд шүү дээ. Тамирчин хүнийг амжилт гаргахыг шахдаг, зөвлөдөг хэрнээ буруудангуут нь хаячихдаг. Олон сайхан залуус сэргээшийн хохирогч болоод архичин болсон түүх цөөнгүй.
Хамгийн сүүлд гэхэд Улсын аварга Н.Батсуурь багтраанд уудаг эмийг багш, дасгалжуулагч нартайгаа зөвлөж байгаад хэрэглэсэн гэдгээ зарласан. Хятадын хуулиар бол гэмт хэрэг хийхийг нь хүлээн зөвшөөрсөн, хориогүй гэдгээр багш дасгалжуулагч нь буруудна. Тэгэхээр багш дасгалжуулагч хариуцлагатай болж ирнэ гэсэн үг.
Нэг шавиа сэргээшийн асуудлаар эрхийг нь хасуулчихаад дахиад нэг нөхрийг дагуулчихсан “Олон шавьтай хүн” гээд яваа дасгалжуулагч нар бий шүү. Улсын аварга Э.Оюунболдад цуг бэлтгэл хийдэг нөхөр нь “Энэ янзтай бяр оруулна” гээд цай шиг зүйл уулгасан гэх яриа ч бий. Аварга цолтой ахимаг бөх таван сая төгрөгөөр сэргээшийн эм бэлдмэл зардаг ч гэх шиг.
Компанийн захирлууд өөрийн бөхдөө уураг витамин гэхээсээ илүү сэргээш олж өгдөг гэх мэт ярианууд Хятад шиг хууль хэрэглээд эхэлбэл ул мөргүй алга болно. Дэлхийд шившиг болсон ОХУ-ын Олимпийн хороо яг ийм арга хэмжээг авахаар ярилцав. АНУ гэхэд хуурамч хандив цуглуулсан, нэр барьсан асуудалд 5 жил хүртэл хорих ял оноож байна. Энэ мэт шууд аваад хэрэглэх хуулиуд цаагуур чинь зөндөө байна шүү.
Спорт өөр эв нэгдэл, улс орны нэр төртэй хамт явдаг учраас сэргээшийн асуудалд Засгийн газар хатуу чанга бодлого барих ёстой. Нэрээ сэвтүүлсэн улс төрчид сэтгүүлчид хорих я,л ноогдуулж байхад Монгол Улс дэлхийд шившиг болчихоод яагаад тэр тамирчинг шийтгэж болохгүй гэж. Улсынхаа нэрийг өндөрт өргөх үүрэгтэй нөхдүүдээс ёсзүй шаардах цаг болсон гэдгийг гадаад улсууд чухалчилж байгааг харж байгаа болов уу манайхан…
