Монголын өдөр тутмын сонинуудын “Эрэн сурвалжлагч” нэгдэлд итгэхгүй байх үндэс бий юу, худал мэдээлэл тараах субъект мөн үү. Үнэндээ бол байхгүй. Өдөр тутмын сонинд ажиллаж үзээгүй, зөв ч бичиж чаддаггүй сурвалжлагч нар сэтгүүлч биш. Сэтгэдэг боддог толгойнууд сэтгүүлч байхаас “Цагаан баавгай буудсан” гэсэн наргианы мөрөөр гэм буруутанг хайдаг хүнийг хэлэхгүй.
Өдөр тутмын сонинуудын “Эрэн сурвалжлагч” нэгдлийн гаргаж буй баримт, мэдээлэл үнэн бодитой, өндөр түвшний мэдээлэл байдаг. Энэ удаа Ерөнхийлөгч Х.Баттулгын оффшор данс, АНУ-д авсан хаусны тухай мэдээллийг гарган тавив. Ямартай ч тэр С.Баярцогтоос том оффшорчин, С.Баяраас илүү хаус худалдан авагч болох нь тодорхой харагдана.
Оффшор бүст данс нээхдээ эхлээд өөрийн Д0001046 тоот дипломат паспорт ашиглан нээдэг байсан бол сүүлдээ охин, туслах, ах, ахынхаа эхнэр, хүргэн ах нарынхаа нэр рүү шилжүүлсэн баримт цөөнгүй. Энэ нь юу харуулж байна вэ гэвэл “Шаазгай зүү олоод хийх газаргүй” гэдэг шиг 5-6 оффшор дансаа хаалгүй бусад руу шилжүүлээд байсан нь “мөрөө баллах” арга гэлтэй.
“АНУ-ын Нью Йорк мужийн Ниагара хотын Ниагара гудамжны 822 тоотод байрлах 2000 метр квадрат талбай бүхий 86,200 ам.долларын зах зээлийн үнэлгээтэй агуулахын барилгыг 350 мянган ам.доллар буюу 1.0 тэрбум гаруй төгрөгөөр “Ниагара 822” компаниар дамжуулан “MATC Инкорпорэйтэд” компаниас худалдан авчээ. Үүнийг тухайн өдөртөө яг тэр үнэлгээгээр нь гурав дамжуулан худалдаж, дахин “Түмэн Хишигтэн” ХХК-д худалдсан.
Ниагара хотын Ниагара гудамжны 818 тоотод байх оффисын зориулалттай 63,200 ам.доллар зах зээлийн үнэлгээтэй байрыг Жон Бартоломей гэгч нь 2014 оны хоёрдугаар сарын 19-ний өдөр “Ниагара 818” компанид 350 мянган ам.доллараар худалдаж, дахин “MATC Инкорпорэйтэд” компаниар дамжуулан хэд хэдэн удаа худалдан борлуулсаны дараа “Түмэн Хишигтэн” ХХК-д 350 мянган ам.доллараар бэлэн мөнгөөр худалдсан.Ийнхүү 2014 оны хоёрдугаар сарын 19-ний өдөр хэд хэдэн удаагийн үйлдлээр 2.8 сая ам.долларын гүйлгээ АНУ-д хийгджээ.
Х.Баттулга өөрийн төрсөн дүү Х.Баттуулын эхнэр Наранцэцэгийн Алтанцэцэгээр дамжуулан АНУ-ын Виржиния мужийн Вашингтон хотын 42574 Стратфорд Ландинг Ди ар, Брамблетон, ВиЭй 20148-7650 хаягт байрлах 756,780 ам.доллар буюу 2.2 тэрбум төгрөгийн үнэ бүхий байрны мэдээг нийтэд мэдээлэл зардаг truthfinder.com сайт дээр ил нийтлэгдсэн байна.
Голын эрэг рүү харсан цонх, өөрийн эзэмшлийн талбайтай, 3 давхар, тансаг зэрэглэлийн амины орон сууцыг тэд худалдан авсан байгаа юм. Одоо ч энэ өмч нь тэдний нэр дээр бүртгэлтэй байна” гэсэн мэдээлэл баримтууд өөрийн эрхгүй сонирхол татна.
Үүнээс үүдэн дүгнэлт хийхэд Х.Баттулга АНУ-д ийм олон хаусаар юу хийх гэж авав. Хэний мөнгөөр авав. Яагаад нуув гэсэн асуулт гарч ирнэ. Магадгүй энэ Ерөнхийлөгчийн албанаасаа буугаад АНУ руу оргон зайлах юм биш байгаа. Тэгээгүй бол мөнгөө, байраа бэлдээд баймааргүй юм. Яагаад энэ “Мах импекс” компанийнхаа цонхыг вакум болгодоггүй юм бэ. Зүгээр өнгөлөн далдлалт уу гэсэн бодол төрнө. Бид энэ мэдээллийн талаар Х.Баттулгаас бус хууль хяналтын байгууллагаас тайлбар шаардах эрхтэй.
