Ё.Шүpэнчулуун:“BMGL” компанийнхан “Өндөр өртөгтэй оронд эмчилгээ хийлгэхээр бол бид төлбөрийг төлж чадахгүй” гэсэн
Тоглоомын талбайд тоглож байсан 12 настай охин хүнд бэртэж, сэхээнд орсон хэрэг өнгөрсөн тавдугаар сарын 31-нд гарсан. Тодруулбал, Баянгол дүүргийн XV хорооны 23 дугаар байрны тоглоомын талбайн савлуур унаж, 12 настай охины гавлын яс цууран, тархинд нь цус хурсан юм.
Охин хэдэн сарын турш Гэмтэл, согог судлалын үндэсний төвд хэвтэн эмчлүүлж, гавлын яс тайруулах мэс засалд орсноор саяхан эмнэлгээс гарчээ. Хэдийгээр эмнэлгээс гарсан ч охин хамгийн багадаа хоёр жил сургуульд явах боломжгүй болжээ. Энэ талаар А охины аав Ё.Шүрэнчулуунаас тодрууллаа.
-Тухайн үед юу болсон талаар нэхэн сануулахгүй юу?
-Миний охин Ш.Анужин эмээ, дүү хоёртойгоо цуг салхилахаар тавдугаар сарын 31-ний 18:00 цагийн үед гэрээсээ гарсан юм. Тухайн хэрэг 19:00 цаг жаахан өнгөрч байхад болсон гэсэн. Хүүхэд л болсон хойно тэрүүгээр гүйж, харайж яваад шинэ тавьсан гулсуур, савлуур дээр тоглож л дээ. Гэтэл тоглоод удаагүй байтал өнөөх нь унаж, толгойг нь цохиж, ухаан алдаж унасан гэж эмээ нь хэлсэн. Охин маань “Шинэ тоглоомын талбай учраас тоглосон. Тоглоод удаагүй, ганц, хоёрхон савлаад л нураад уначихсан” гэсэн. Охиныг унах үед ээж маань хажуу талынх нь сандал дээр сууж байсан.
Сандраад гүйгээд очиход охины ухаан балартчихсан, босож чадахгүй байсан гэсэн. Савлуурын хөндлөн төмөр толгой дээр нь унасан байгаа юм. Тэгээд охиныг сандал дээр хэвтүүлээд, арай дээрдэхээр нь дагуулаад гэртээ ирсэн. Толгой, тархи нь хагарч, дух, нүүрнээс нь цус гараагүй болохоор түргэн дуудаагүй юм билээ. Гэртээ ирээд энэ талаар надад утсаар хэлсэн. Би ч ажлаасаа ум хумгүй иртэл охин маань зогсоо зайгүй бөөлжөөд, шоконд орсон байдалтай байсан. Тэгээд шууд ГССҮТ-д өөрсдөө очиж, охиноо үзүүлэхэд гавлын яс нь цуурч, тархинд нь цус хурсан байна лээ. Бид хэдэн сар эмнэлгээр яваад, хагалгаанд орсон. Одоо гэртээ хэвтрийн дэглэм барьж байгаа.
Одоо охины тань биеийн байдал ямар байна вэ?
-Эмч нар гавлын яс нь цуурч, тархинд цус хурсан гэдэг онош тавьсан. Анх эмнэлэгт хүнд төмөрт даруулж, бөөлжөөд байна гэсэн зовиуртай очиход эмч нар “Бөөлжөөд байвал тархиндаа гэмтэл авсан, эсвэл цус хурсан байж магадгүй. Мөн яс нь цөмөрч, цуурахад иймэрхүү шинж тэмдэг илэрдэг юм. Танай хүүхдэд эдгээр шинж тэмдгээс 1-2 нь илэрч байна” гээд тархины зураг яаралтай аваад, тохирох эмчилгээг цаг алдалгүй хийсэн. Охин маань одоо хувийн эмнэлэг болон ЭХЭМҮТ-ийн мэдрэлийн эмчийн хяналтад байгаа. Эмч нар “Ойрын хоёр жилдээ тархинд ачаалал өгч болохгүй.
Цаашид гарах сөрөг нөлөөг нь эрт оношлох боломжгүй. Яваандаа унаж, татдаг болж магадгүй. Зөвхөн ажиглах шаардлагатай” гэж хэлсэн. Үүнээс л сэргийлэх арга хэмжээ авах хэрэгтэй байгаа. Тэгээд бид БНСУ-ын эмч нарт охиныхоо эрүүл мэндийн материалыг явуулах гээд хөөцөлдөж байна. Одоо ганц, хоёр материал бүрдүүлэх дутуу.
-Тухайн үед тоглоомын талбайн тоглоомуудыг шинээр тавиад удаагүй байсан юм билээ. Хариуцаж гүйцэтгэсэн компанийхан нь тантай холбогдсон уу?
-Тухайн компани хэрэг гарснаас хойш хэсэг хугацаанд бидэнтэй холбогдоогүй. Би Нийслэлийн хөрөнгө оруулалтын газар, АТГ-т тоглоомын талбайн ажлыг гүйцэтгэсэн “BMGL” гэх компанийг шалгаж өгөхийг хүссэн өргөдөл өгсөн юм.
Үүний дараагаар тухайн компаниас над руу залгаад “Өндөр өртөгтэй оронд эмчилгээ хийлгэхээр явах бол бид төлбөрийг төлж чадахгүй” ухааны юм ярьсан. Гэтэл өмгөөлөгч нь “Танайх эмчилгээний төлбөрийн хэдэн хувийг гаргах боломжтой вэ” гэж асууж байна лээ. Тэгэхээр нь би олигтой юм хэлээгүй, хаячихсан байгаа. Охиноо эрүүл болгож байвал шаардлагатай эмчилгээг хаана ч хийлгэнэ л гэж боддог.
-“BMGL” компанийнхан охины тань эмчилгээний зардалд мөнгө өгсөн үү. Хэдэн төгрөг өгсөн бэ?
-Өгсөн, яг хэдэн төгрөг өгснийг нь банкны хуулга харж байж мэдэх боломжтой. Ямар ч байсан 200, 100, 500, 300, 600 мянган төгрөг уван цуван өгсөн.
-Хэрэг одоо мөрдөн байцаалтын шатандаа явж байгаа юу?
-МХЕГ-аас хүүхдийн тоглоомын талбай стандарт хангасан эсэх, тоглоомын талбайг “BMGL” компани зөв, буруу хийсэн эсэхийг тогтоож өгөөгүй байгаа. Одоо зөвхөн энэ хариуг хүлээж байна. Хэрэв хариу л гарчих юм бол хэрэг шүүхэд шилжинэ. Өнгөрсөн долдугаар сараас л МХЕГ ажиллаад дүгнэлтээ гаргаж чадаагүй.
