МУГЖ Г.Золбоот оршин суугчдыг турхирч, ‘Бөхбат’ ХХК-ийн газрыг цуцлуулна гэж шантаажилжээ. 2020 оны 09 дүгээр сарын 01-ний өдөр Товч.мн сайтад ‘Бөхбат ХХК’-ийн Яармагт ашиглаж буй газрын талаар ташаа мэдээлэл гарчээ. Иймд мэдээллийг тэнцвэртэй байлгах үүднээс бид Бөхбат ХХК-ийн менежер А.Нямбатаас албан ёсны мэдээлэл авлаа.
Бөхбат ХХК-ийн менежер А.Нямбат:
‘Манай компани нь хуулийн дагуу олгогдсон газартаа батлагдсан ерөнхий төлөвлөгөөний дагуу ямар нэгэн зөрчилгүй, үйл ажиллагаа явуулаагүй зөвхөн барилгын хашаа барьж байсан. Гэтэл манай газрын хилийг давж баригдсан ‘Хүннү Вилла’ хотхоны нэг байрны оршин суугчид биднийг хууль бус газар зөвшөөрөлгүй барилга барьж байгаа мэтээр гүтгэсэн. Мөн олон нийтийн мэдээллийн хэрэгслийг ашиглаж бусад хотхоны оршин суугчдад ч худал мэдээлэл түгээсэн. Энэ үйлдлийг тухайн байранд оршин суудаг олны танил, МУГЖ Золбоот удирдан зохион байгуулсан юм. Удахгүй орон нутгийн сонгууль болохтой холбогдуулан “Уулаа хамгаалъя” гэсэн нэрийн дор оршин суугчдыг турхирч, манай ‘Бөхбат’ ХХК-ийн газрыг цуцлуулна гэж гарын үсэг цуглуулж, төрийн байгууллагуудыг шантаажилж эхэллээ.
Манай ажилчдад ‘Хоёр гавъяат ирээд явлаа гэж удирдлагууддаа хэлээрэй, та нар энд юм хийнэ гэж байхгүй шүү’ гэх мэтээр дарамталсан үйлдэл гаргаж байна. Иймд Манай компани газрын бичиг баримтууд хуулийн дагуу зөрчилгүй байгаа гэдгийг албан ёсоор мэдэгдэж байна.
Бид 2008 оноос хойш 12 жилийн хугацаанд тус газрын төлбөрийг төлж хуулийн дагуу ажиллаж ирсэн. Харин тухайн байрыг худалдаж авсан иргэд энд нэг жил л амьдарч байгаа. 12 жилийн хугацаанд Нисэх, Яармагийн замын ажил, дэд бүтцийг бий болгох ажлуудаас шалтгаалан яармагийн бүх ажил 2017 оноос хойш эхэлсэн. Бид ч мөн адил 2018 оноос эхэлж газраа ашиглаж эхэлсэн. Харин манай газрын хилийг давж 2019 онд баригдсан Хүннү Вилла хотхоны тус барилга нь ерөнхий төлөвлөгөөндөө амрах талбай гэж заасан боловч 4 давхар 36 айлын орон сууц баригдсан. Тус барилгыг улсын комисс хүлээн авч үл хөдлөх хөрөнгийн гэрчилгээ гарсан гэж оршин суугчид нь ярьж байгаа боловч бид үүнд эргэлзэж байгаа.
Иймээс Мэргэжлийн хяналт, хууль хяналтын байгууллагуудад шалгуулах хүсэлтийг өгөх болно. Хууль бус баригдсан барилгыг буулгах хүртэлх хуулийн заалт байдаг. Стандарт зөрчиж эрсдэлтэй орчинд баригдсан барилга авсан гэдгээ мэдсэн оршин суугчид манай газрыг дээрэмдэх санаархал гаргаж байна.
Манай төсөл нь нийтийн эрх ашигт нийцсэн байхаар бид шинэ төлөвлөлт хийж байгаа. Шинэ төсөл хэрэгжих хугацаа болоогүй. Бид зөвхөн барилгын хашаагаа барьсан байгаа’ гэв.