“Урт цагаан”-ы умгар өрөөнд үүсгэн байгууллагдсан М-Си-Эс Групп өдгөө татвар төлөлтөөрөө Эрдэнэт үйлдвэр, “Эрдэнэс Таван толгой” дараа ордог аж ахуйн нэгж юм. Хувийн хэвшлээс улсад татвар төлөлтөөрөө тэргүүлдэг ТОП-100 аж ахуйн нэгжид 20 гаруй охин компани ордог хүчирхэг групп юм. Нэг хэсэг 200 гаруй компанитай гэгдэж төрийн бүх тендер, шалгаруулалтад ордог байсан билээ. 2000 оноос эхлэн бусад аж ахуйн нэгжид боломж олгох үүднээс ижил төрлийн бизнес архи ундаа, тавилга, үйлчилгээний бизнесээсээ татгалзаж эхэлсэн байдаг.
Монголчуудад анх “Коко Кола”-г уулгаж, Шангри-Ла зочид буудлыг барьж Хонконгийн бирж дээр “Ухаа худаг”-ийн лиценз барьцаалан хувьцаа гаргаж АНУ багштай Орчлон сургууль барьж гадныханд “АСЕМ Вилла”-гаар нүүр тахалсан байдаг. Улс төрд нөлөө бүхий компани гэдэг ч тэд шиг олон ажлын байр бий болгодог, татвар төлдөг аж ахуйн нэгж үгүй юм.
Магтаад ч муулаад унахаа байсан энэхүү групп нийгмийн хариуцлагынхаа хүрээнд агаарын бохирдлыг бууруулахад хүч нэмрээ оруулж буй нь мадаг үгүй үнэн билээ. Өдгөө тус группийн Захирлуудын Зөвлөлийн Дарга Ж. Оджаргал МС нэртэй хүчирхэг банк байгуулж байна.
Тус банкны 20 хувийг нөлөө бүхий гадны санд зарж баталгаажуулж авчээ. Улс төрийн цаг агаар хааш ч эргэхээр өнөө үед Жамц баян шиг ихэнх бизнесээ хатуу юм болгосон М-Си-Эс групп банк байгуулахаас ч яах билээ дээ. Сүртэй нээлт, тууз хайчлалт, улаан хивс дээгүүр улс төр, бизнесийн хэн хэн алхах нь хэвлэлийн анхаарлыг татах биз.