УИХ-ын гишүүн асан Ч.Улаан, Д.Лүндээжанцан нарыг цаг агаарын мэдээ анхааралтай сонсдог, тэр бүү хэл цаг агаарын мэдээг сар жилээр нь урьдчилан авдаг байсан гэдэг.
Тэгээд бороо орох, дулаарах өдрийг тооцон сонгогдсон тойрогтоо “Хур дагуулан очдог” байсан гэдэг юм. Түүнтэй адилхан улс төрийн намуудын мөрийн хөтөлбөр, УИХ-аас батлах хуулийг урьдчилан аваад жагсдаг нөхдүүд бий болжээ.
Тухайлбал МАН-ын хөтөлбөрт зээлийн хүүг нэг оронтой тоонд оруулах, буулгах заалт бий. УИХ-ын анхны чуулган нээлтээ хийнгүүт Г.Занданшатар нэн түрүүнд банкны зээлийн хүүг бууруулах хуулийг батлана гэдгээ зарласан. Гэтэл МАХН-ын залуучуудын дарга асан, Монголын Ногоон намаас УИХ-д нэр дэвшигч, Улсаа аврах ард түмний хөдөлгөөний тэргүүн, “Хатан Туул” хөдөлгөөний тэргүүн, Оффшорын эсрэг хөдөлгөөний тэргүүн, Ард түмний штабын тэргүүн Б.Жагар банкны хүүг бууруул хэмээн жагсах болжээ.
Мөн тэрээр урьд нь хүүхэд бүрт 100 мянган төгрөг олгуулах мэдээг урьдчилан аваад тэмцэж байсан байдаг юм. У.Хүрэлсүхийг амьд мал гадаад руу гаргахыг хориглох шийдвэр гарахаас өмнө жагсч өөрөөрөө овоглуулсан билээ. Тэрээр “Би Хүрэлсүхээр мал гаргахгүй байх шийдвэрийг гаргуулсан” гэх. Үнэн чанартаа У.Хүрэлсүхтээ ч биш, Б.Жагартаа мундагтаа биш БНХАУ-ын тал амьд мал авахгүй байх шийдвэр гаргасан юм.
Бямбасүрэнгийн Жагар НИТХ-ын дарга асан Ц.Сандуйг огцруулахаар жагсаж байлаа. УИХ-аас Оюутолгойн гэрээг шалгах ажлын хэсэг байгууллагдангуут, Тавантолгойн хувьцааны ноогдол ашиг олгох, Хаан банкыг хүүгээ бууруулан шаардан жагсдаг ч төдхөн зогсчихдог. Ураны эсрэг жагсаж байснаа төдхөн болино. Нэг хэсэг зээлийн хүүг бууруулна хэмээн ББСБ-уудаар их явсан. Энэ бүхний цаана ажил төрөлгүй тэд хөлсөөр жагсан амьжиргаагаа залгуулдаг бага зэргийн мөнгө олдог байж магадгүй гэх хардлага олон нийтэд явдаг юм. Тухайлбал Ц.Сандуй руу оймс шидэх ажиллагааг МАН-ын генсекийн захиалгаар хийсэн гэх яриа байдаг.
Яг ийм эх оронч дүртэй, орж гарсан нөхдүүд олширч олон нийтэд санаатай санаагүй мэдээ түгээж бужигнуулах юм. Ерөнхийлөгч Х.Баттулгын санаачилсан Үндсэн хуулийн 6.2 заалт “Тусгаар тогтнолд аюул учирлаа, эх оронгүй боллоо гэж эх оронч болгон ярьсан. Бүр жагсах цуглах дээрээ тулсан. Хятадын сайтад Монголын газар нутгийг гутал хувцас шиг зарж байна гэж мэдээлээд өдөөгөөд байсан билээ.
Гэтэл өнөөдөр тэдгээр ярьсан эх оронч нөхдийг хэлэлцүүлэг хийхэд олигтой дуугарах, баталгаа нотолгоо гаргах нэг ч хүн байсангүй. Гавъяат хуульч С.Нарангэрэл гуайн тайлбарыг бодитой эсэргүүцэх, няцаах хэмжээний эх оронч (Шинжээравдан, Цоодолын Хулан, Халуун цуст Тулга, Т.Баярхүү, МАХН-ын эрдэмтэд бүгд байв шүү) нэг ч гарсангүй. Ерөнхийлөгчийн Х.Баттулгын 6.2 заалтад бараг алга ташаад “буруугаа ойлгон” гарч одлоо.
Эх оронч гэхээр л бухимдсан, эрх баригч нарыг цаазална, шоронд хийнэ, цуст тэмцэл хийнэ гэсэн улс. Үнэхээр л цаазламаар, шоронд хиймээр байгаа бол өөрсдөө хийхгүй. Ард түмнээр тэмцэл тулаан, цуст мөргөлдөөн хийлгэх санаатай. УИХ-ын гишүүдийг хулгайч, хог шаарууд, алуурчин, авлигач, хүчиндэгч гэж муулна. Тийм атлаа тэр хүчиндэгч, алуурчин, авлигач нарын эгнээнд элсэх гэж бүх эх орончид эр эмгүй УИХ-д дэвшинэ. Нүх сүв олдвол албан тушаалд очино гэж сэм сураглана. Ийм эх орончид байдаг юм уу таминь ээ.